Элсэлтийн шалгалтад 49 014 хүүхэд бүртгүүлсний 72 хувь нь математик сонгожээ 

Элсэлтийн шалгалтыг энэ сарын 25-28- нд улсын хэмжээнд зохион байгуулна. Эхний өдөр хүүхдүүд түүх, англи хэлний хичээ­лээр шалгуулах бол 28-нд физик, орос хэл, монгол хэлний шалгалтад хамрагдах юм. Өөрөөр хэлбэл, эдгээр дөрвөн өдөр нийт 10 хичээлээр шалгалт өгөх бөгөөд заа­сан хугацаанаас нэг цагийн өмнө шалгалтын байранд очиж, анги, танхимд 10 ми­нутын өмнө суудлаа эзэлсэн байхыг Боловсролын үнэлгээний төвөөс санууллаа.

Энэ оны элсэлтийн шалгалтад нийт 49 014 шалгуулагч бүртгүүлжээ. Тэдний 87 хувь нь 2026 оны төгсөгч бол 13 хувь нь өм­нөх оных аж. Бүртгүүлэгчдийн 55 хувийг эмэгтэй, 45 хувийг эрэгтэй хүүхэд эзэлж байна. Мөн шалгуулагчдын 53.2 хувь нь нийслэл хотынх. Тодруулбал, нийт шал­гуулагчийн хамгийн олон буюу 26 100 нь нийслэлд бүртгүүлсэн бол Хөвсгөлд 1923, Дархан-Уулд 1764, Орхонд 1756, Өвөр­хангайд 1426, Ховдод 1350 хүүхэд шалгалт өгөх нь. Шалгуулагчдын хамгийн их сонгосон хичээл нь математик, англи хэл, нийгэм судлал. Тухайлбал, 35 271 хүүхэд ма­тематик, 33 177 нь англи хэл, 31 431 нь ний­гэм судлалын хичээл сонгож бүртгүүл­жээ. Өөрөөр хэлбэл, математикийн хи­чээ­лийг нийт шалгуулагчийн 72 хувь нь сон­госон байгаа юм. Харин хамгийн цөөн хүү­хэд сонгосон хичээл нь газар зүй, түүх, орос хэл.

Ташрамд, өнгөрсөн оны элсэлтийн шалгалт зургаадугаар сарын 18-21- нд болсон бө­гөөд 43 318 шалгуулагч бүртгүүлсний 3000 нь өмнөх оны төгсөгч байжээ.

Ч.Болор