Энэ оны наймдугаар сарын 12-18-ны өдрүүдэд ОХУ-ын Калининград хотноо Оросын залуучуудын боловсролын чуулга уулзалт болох гэж байна. Уг арга хэмжээний оролцогчид орос хэл, чанартай боловсрол, шинэ боломжууд гэх мэт асуудлыг хэлэлцэж, санал бодлоо хуваалцах юм.
2024/25 оны хичээлийн жилд манай 620 оюутан ОХУ-д суралцах квот авсан нь сүүлийн жилүүдэд байгаагүй өндөр үзүүлэлт юм. Одоогийн байдлаар ОХУ-ын их, дээд сургуульд нийтдээ 8000 гаруй манай улсын иргэн суралцаж байна. Сүүлийн арван жилийн хугацаанд 70 гаруй мянган иргэн ОХУ-ын их, дээд сургуулийг амжилттай дүүргэсэн юм. Энэ нь манайд орос хэл, боловсролыг сонирхох сонирхол тогтвортой өсч байгааг харуулж байгаа бөгөөд сүүлийн жилүүдэд “Россотрудничество” агентлагийн дэмжлэгтэйгээр орос хэлийг гүнзгийрүүлэн судлах 57 төв нээгдсэн билээ.
2024 оны арваннэгдүгээр сард Монгол Улсад Глазовын их сургуулийн “Оросын филологийн сургууль” төсөл хэрэгжиж эхэлсэн. Орос хэлний мэдлэг нь Оросын тэргүүлэх их дээд сургуулиудад суралцах төдийгүй хоёр улсын оролцоотой аж ахуйн нэгжүүдэд ажиллах боломжийг нээж өгдөг юм.
Залуучуудын боловсролын чуулга уулзалт нь манай залуучуудад медиа төслүүдээр дамжуулан хэлний мэдлэгээ дээшлүүлэх, оросын үе тэнгийнхэнтэйгээ харилцах боломжийг олгож байна. Монголын 40 багш, оюутан Уралын холбооны их сургуулийн мэргэжилтнүүдтэй хамтран Екатеринбургийн тухай 8 хичээл, видеог багтаасан дижитал орос хэлний заах арга зүй боловсруулсныг тэмдэглэх нь зүйтэй болов уу.
Манай хоёр улсын боловсролын салбарын хамтын ажиллагааны нэгэн тод жишээ бол Плехановын нэрэмжит ОХУ-ын Эдийн засгийн их сургуулийн Улаанбаатар дахь салбар бөгөөд тус сургууль нь таван жилийн магадлан итгэмжлэл авсан юм. Үүний зэрэгцээ манайд оросын боловсролын стандарттай 3-5 сургууль шинээр нээхээр төлөвлөж байна. Монголын Орос хэлний багш нарын холбооны ерөнхийлөгч Ц.Магсар эдгээр санаачилга нь эрчим хүч, ложистикийн гол салбаруудын мэргэжилтэн бэлтгэхэд тус дөхөм болж байгааг хэлсэн юм.
Монголын сэтгүүлчид уг залуучуудын боловсролын чуулга уулзалтад оролцож санаа бодлоо танилцуулах боломжтой билээ. Пушкины нэрэмжит уралдааны оролцогч, орос хэлний багш Сандема Доржиевагийн тэмдэглэснээр уг арга хэмжээ нь залуучуудад “олон улсын хэвлэл мэдээллийн салбарын нэгэн салшгүй хэсэг болоход тус дөхөм болдог”.
Улаанбаатар хот дахь Оросын шинжлэх ухаан, соёлын төв нь орчин үеийн сургалтын арга барилаар орос хэлний сургалт явуулж байна. 2024 онд ОХУ-д Монголын 77 багш мэргэжил дээшлүүлэх сургалтад, 100 гаруй сурагч, оюутан орос хэлний зуны сургалтанд хамрагдсан юм.
Оросын залуучуудын боловсролын чуулга уулзалт нь манай хоёр улсын хамтын ажиллагааг хөгжүүлэхэд түлхэц өгөх хүлээлттэй байна.
