Алтны үнэ түүхэндээ байгаагүй огцом өсөлтийг 2025 онд үзүүлж, бүх цаг үеийн дээд амжилтаа эвдсээр байна. Энэ он гарсаар шар ме¬тал¬лын ханш 50 гаруй хувиар өсөж, алт руу хошуурах хөрөнгө оруулагчдын сонирхлыг хамгийн ихээр татлаа. АНУ-ын Засгийн газар санхүүжилтгүй болсон, Холбооны нөөцийн банкны бодлого, геополитикийн болон эдийн засгийн тодорхойгүй нөхцөл байдал алтны эрэлтийг эрчимтэй нэмэгдүүлж, саяхан унц нь 4000 ам.доллар давсан юм. Тэгвэл шинжээчид “Алтны эрин үе үргэлжилнэ” гэж үзэн, дор бүрдээ өөдрөг бөгөөд тогтвортой таамаг дэвшүүлсэн хэвээр байна. Спот алтны ханш унц нь өчигдөр 4060 ам.долларт хүрч, энэ онд 40 дэх дээд амжилтаа тогтоосныг Mining.com онцолсон бол “Wheaton precious metals” компанийн СЕО Рэнди Смоллвүүд ганцхан жилийн дотор энэхүү өсөлтийг 5000 ам.доллар давж, 10 жилийн дараа гэхэд үүнээсээ ч хоёр дахин өсөх боломжтой гэж үзжээ. Энэ салбарт сүүлийн хэдэн 10 жилд тохиолдож байгаагүй үнийн өсөлт гарч, дэлхий даяарх алтны томоохон төслүүдэд шинэ нөхцөл байдал авчирсан нь энэ юм.
Г.Сансар
