Дэлхийн шилдгүүдийн эн тэнцүү өрсөлдөөнөөс манайхан 12 медаль хүртлээ

Дэлхийн бөхийн нэгдсэн холбоо албан ёсны хуваарьтаа багтсан дэлхийн чансааны оноо олгох цуврал тэмцээнийг Улаан­баатар хотод зохион байгуулсан. “БуянтУхаа” спорт цогцолборт дөрвөн өдөр болсон хоёр дахь цувралд 23 орны 300 гаруй тамирчин хүч сорьж, олимп, тив, дэлхийн аварга,медальтнууд ч оролцсон нь үзэгчдийн анхаарлыг та­тав. Монголын шигшээ багийн тамирчид нут­гийнхаа дэвжээнд хоёр алт, тус бүр таван мөнгө, хүрэл, нийт 12 медальтай өндөрлүүлж, бөхийн хор­хойтнуудыг баярлууллаа. Сонгомол бөхийн төрөлд өрсөлдсөн тамирчдаас хошой мөнгө, нэг хүрэл медаль хүртэж, багийн дүнгээр Энэтхэг, Киргиз улсын ард III байрт шалгарсан нь олон улсын түвшинд үзүүлсэн өндөр амжилт байв. Тухайлбал, “Парис-2024” олимпын аварга Ма­го­мед Рамазанов, дэлхийн хошой аварга, “Па­рис-2024” олимпын мөнгөн медальт Рахман Аму­задхалили, 2024 оны дэлхийн аварга Моэ Киёока, өнгөрсөн жилийн ДАШТ-ий алтан медальт Хан Чон Сон, Ази тивийн аварга Сужеет Сужеет нар манай улсад хөл тавьсан нь тэмцээний уур амьсгалыг өрсөлдөөн ихтэй, сонирхолтой болгосон. Өмнө нь зөвхөн зурагтаар хардаг байсан дэлхийн шилдгүүдийн ба­рил­дааныг дэргэдээс нь үзэх боломж гарсанд үзэгчид баярлаж буй нь тэмцээний үед ажиг­лагдсан юм. Тивийн орнуудаас Энэтхэг улс бө­хийн гурван төрөлд олон тамирчнаа илгээж, өргөн бүрэлдэхүүнтэй оролцлоо.

Эхний өдөр сонгомол бөхийн барилдааны 55 кг-ын жинд Монголын багаас ОУХМ М.Даваабанди аваргын төлөө Ираны тамирчин, ДАШТ-ий мөнгөн медальт Паям Фарзад Ах­ма­дитай өрсөлдөн мөнгөн медаль зүүснээр өм­нөх жилийнхээ амжилтыг ахиулж, шагналын сал­хи амжилттай хагалсан. Тус жинд хүч үзсэн Туркийн тамирчин Мухаммет Эмин Ча­кыр хүрэл медальтай нутаг буцав. 97 кг-д оролцсон улсын харцага, ОУХМ Г.Ганхуяг хагас шигшээд Энэтхэгийн бөх, Азийн АШТий мөнгө, хүрэл ме­дальтай Нитешт ялагдсан ч хүрэл медалийн төлөө Венесуэлийн Хуан Леонардо Диаз Бланког цаг дуусахаас өмнө даралтаар буулган авч, хүрэл медалийн эзэн болсноор “Улаанбаатар опен” тэмцээнд хоёр жил дараалж шагналын тавцанд зогслоо. Хүнд жин болох 130 кг-ын жинд зодоглосон 20 хүртэлх насныхны ДАШТ-ий хүрэл медальт Б.Намбардагва өмнөд хөршийн Дон Жи Ёныг илүүрхэж, хагас шигшээд Казахстаны Олжас Сырлыбайг 2:1-ээр ялсан юм. Түүнчлэн аваргын төлөө БНСУ-ын тамирчин, ДАШТ-ий хүрэл медальт Ким Мин Сеоктой өрсөлдөж 0:8-аар хожигдсоноор мөнгөн ме­даль гардсан. 

Чөлөөт бөхийн тэмцээний хоёр дахь ба­рилдаанд эмэгтэйчүүдээс 53 кг-ын хагас шиг­шээд Б.Отгонтуяа Японы тамирчин, дэл­хийн аварга Мое Киёокатай таарч 4:2-оор ялагдаж, хүрэл медалийнтөлөөНигерийнтамирчин,Африкийн гурван удаагийн аварга Кристиана Толулопе Огун­саньяг хожин хүрэл медальтнуудыг тоог ахиулав. 59 кг-д Энэтхэгийн Неха, БНАСАУын Хон Пёл нар түрүү булаалдахад Неха ялж хошой аварга боллоо. Манайхаас Х.Бо­­ лор­туяа медалийн тө­лөөх барилдаанд Туркийн туршлагатай тамир­чин Бедиха Гүнийг да­рал­таар цэвэр ялж, шаг­налын буухиаг үр­гэлж­лүүлсэн юм. 68 кг-ын жинд шилдэг дөрөвт тунасан тамирчдаас Э.Дэл­гэр­маа хагас шигшээд БНАСАУ-ын тамирчин, Азийн АШТий мөнгөн медальт, Армийн дэл­хийн аварга, Пак Сол Гумаас даагаа нэхэж, тун сонирхолтой барилдаан өрнүүлсний эцэст ял­сан. Тэрбээр аваргын төлөө 23 хүр­тэлх насныхны дэлхийн аварга, ОХУ-ын Эли­завета Петлиаковаг 8:2оор илүүрхэж тү­рүүлс­нээр Монголын багийн анхны алтан медалийг эх орондоо авчирсан билээ. 72 кг-ын жинд хүч сорьсон шигшээ багийнхнаас З.Болортунгалаг, Э.Одгэрэл нар хагас шигшээд шал­гарсан. З.Болортунгалаг жин­гийнхээ хам­гийн хүчтэй өрсөлдөгч болох Азийн дөрвөн удаа­гийн аварга, ДАШТ-ий гурван мөнгө, нэг хүрэл медальт Казахстаны Жамила Бак­бергеноваг буулган авч, түрүү байрын тө­лөө Польшийн тамирчин Викториа Холүйтэй барил­дан, мөнгөн медаль зүүсэн. Харин Э.Од­гэрэл хүрэл медалийн төлөөх өрсөлдөөнд З.Болор­тун­галагт ялагдсан Казахстаны Жамила Бак­бер­геноваг хожиж III байр эзэллээ.

Эрэгтэйчүүдээс 70 кг-ын шигшээ наймд оноолт таарсан Гавьяат тамирчин, ДАШТ-ий мөнгө, хүрэл медальт, Азийн наадмын аварга Т.Тул­га, АНУ-ын Кросс Майкл Василевски нар гал гартал барилдаж, үзэгчдийг догдлуулан суудлаас нь хэдэнтээ өндөлзүүлэв. Энэ удаа Т.Тулга жингийнхээ амаргүй хүчтэнийг 5:4өөр хожсон юм. Америкийн тамирчин шаггүй өрсөлдөгч гэдгээ харуулж, манай бөхөөс барилдааны төгсгөлд дөрвөн оноо салгасан ч ялагдсан.Энэудаа Киргизийнтамирчиджинтус бүрд хүчтэй өрсөлдөгч гэдгээ харуулж өн­гөлж барилдсан. Алтан медалийн төлөө Т.Тул­гатай шигшээд Киргизийн тамирчин Рус­там­жан Кахаров барилдахаар шалгарсан ч бэртлийн улмаас дэвжээнд гараагүй тул Т.Тулга нутагтаа аваргын хоёр дахь түрүүг авчирсан билээ. 79 кг-д Азийн АШТ-ий хошой хүрэл медальт О.Сүлдхүү хойд хөршийн тамирчдаас Европын аварга Исмайл Ханиевтай хагас шигшээд хүч сорьж хожсоноор медалийн төлөө Энэтхэгийн тамирчин, Азийн АШТ-ий мөнгөн медальт Сандип Сингх Манныг оноогоор цэвэр хожиж, энэ удаа зорилгодоо хүрсэн юм. Улмаар 97 кг-ын жинд Т.Дэмчигдорж аваргын төлөөх барилдаанд 23 хүртэлх насныхны Европын АШТ-д сүүлийн хоёр жил дараалж түрүүлсэн ОХУ-ын Мухамед Ханиевт оноогоор ялагдаж, мөн­гөн медаль хүртэв. Манай тамирчин өнгөрсөн жил медалиас мултарсан бол хоёр дахь цувралд амжилт гаргаж, ганзага дүүрэн тэмцээнийг өндөрлүүллээ.