“Дэлхийн нүүдэлчдийн оюун санааны төв байх учиртай” 

Мон­гол Улсын соёлын биет бус өвийг хамгаалах, сурталчлах, өвлөн уламжлагчдыг алдаршуулах зо­рил­готой “Нүүдэлчин” дэлхийн соёлын фестивалийг энэ сарын 21-23-нд зо­хион бай­гууллаа. Налайх дүүргийн нутаг, Тайж хайр­хныбэлд болсон тав дахь удаа­гийн энэхүү арга хэмжээнд 21 аймаг, нийслэлийн өвлөн уламжлагч нар оролцож, соёлын биет бус өвийг олон ул­сад сур­талчилсан төдийгүй буриад сур, өсвөрийн шагайн, морьт харваа, үндэсний, уран уургач, бугуйлч, эмнэг бул­гиулах, ташуур шүүрэх, “Морьтой монголжин”, модон бөмбөг зэрэг сонирхолтой тэмцээн, уралдаан зохион байгуулсан юм. 

Ерөнхийлөгч У.Хүрэлсүх фестивалийг нээж “Энэ наадам бол соёлын биет бус өвийн шавхагдашгүй, давтагдашгүй сан хөм­рөг, үнэт зүйлсээ эрхэмлэн дээдэлж, хайрлан хамгаалж, хойч үедээ өвлүүлэх мон­гол түмний хүсэл эрмэлзлийн илэрхийлэл юм. Монгол Улс нүүдлийн соёл иргэншлийг өвлөн тээж үлдсэн цөөн орны нэгийн хувьд дэлхийн нүүдэлчдийн оюун санааны төв байж, өв соёлыг хадгалан хамгаалах, түгээн дэлгэрүүлэх их үйлсэд ман­лайлан оролцох учиртай” гэв. 

Монгол Улсад оршин буй угсаатны бүл­гүүдийн соёлын биет бус өвийн онц­логийг олон нийтэд таниулах, байгаль, уур амьс­галын өөрчлөлттэй зохицон амьдрах, түүн­тэй харилцан шүтэлцэж ирсэн уламжлалт мэдлэг, арга ухааныг түгээн дэл­гэрүүлэхэд энэ фествалийн зорилго чиглэж буй. Мөн өвлөн уламжлагчдыг тодруулах, тэдний авьяас чадварыг дэмжих, залуу үед өв соёлыг өвлүүлэх чухал ач холбогдолтой юм. Энэ үеэр Монголынмастер то­гооч­дын холбооноос зохион байгуулсан “Гиннес”- ийн дээд амжилтад “Монгол зоог”-ийг бүрт­гүүлэх үйл ажиллагаа амжилттай бо­лов. Монголчуудын уламжлалт хүндэтгэ­­лийн зоог болох хорхогийг 1000 тогооч нэ­­гэн зэрэг 1000 тогоонд хийснээрээ Гинне­­сийн дээд амжилтын нэг болжээ.

Ч.Болор