Төрөлжсөн ахлах сургуулийн сургалтын төлөвлөгөөг батлав 

Ерөнхий боловсролын сургуулийн ачааллыг буу­руулах зорилгоор 2026-2027 оны хичээлийн жилд 15-20 төрөлжсөн ахлах сургууль байгуулж, мөн 3000-аас дээш суралцагчтай 38 сургуулийг ийм сургалттай болгохоор бэлтгэж буйгаа Бо­ловс­ролын яамнаас мэдээлсэн билээ. Тэгвэл үүнтэй холбогдуулан төрөлжсөн ахлах сургуулиудад хэрэгжүүлэх сургалтын төлөвлөгөө, удирдамжийг тус яамнаас баталж, ерөнхий боловсролын сургуулийн удирдлагуудад хүргүүлжээ. Мөн энэ шийдвэрийн хүрээнд ахисан түвшний хөтөлбөрийг бүрэн дунд боловсролын сургалтын төлөвлөгөөтэй уялдуулан боловсруулж, холбогдох байгууллагуудтай хамтран ажиллах чиг­лэлийг дээд боловсролын сургал­тын байгуул­лагын за­хирал, ректоруудад өгсөн байна.

Төрөлжсөн ахлах сургуулийн сургалтын төлөвлөгөөний заавал судлах чиглэлд байгалийн бо­лон нийгмийн ухааны 10 хичээлийг багтаажээ. Тодруул­бал, монгол хэл, уран зохиол, үндэсний бичиг, англи хэл, математик, биологи, физик, хими, газар зүй, түүх, нийгэм судлал зэргийг заавал судлах шаард­лагатай гэж үзсэн аж. Эдгээр хичээлийг суд­лах цагийг 10-12 дугаар анги тус бүрд ялгаатай тогтоосон байна. Жишээлбэл, ахлах ангийн сурагчид англи хэл, математикийн хичээлийг жилд хам­гийн багадаа 102 цаг үзэх ёстой гэж тө­лөв­лөгөөнд тусгасан бол түүхийг 34, байгалийн болон нийгмийн ухааны ихэнх хичээлийг 68 хүр­тэлх цаг суд­луулахаар заа­жээ. Харин сонгон суд­лах чиглэлд бүрэн дунд боловсролын болон олон улсын, ахи­сан түвшний хө­төл­бөр, чадамжид суу­рил­сан мэр­гэжлийн сургалт зэр­гийг багтаасан аж. Эд­гээрийн цагийг жилд 340-850 байхаар тог­тоо­жээ.

Н.Мишээл