Манай улс энэ оны эхний есөн сард 8.3 тэрбум ам.долларын бараа, бүтээгдэхүүн импортолжээ. Харин 14.4 тэрбум “ногоон”-ы үнэ бүхий эрдэс, түүхий эд экспортод нийлүүлснийг Гаалийн ерөнхий газраас мэдээллээ. Ингэснээр гадаад худалдааны бараа эргэлтийн хэмжээ 22.7 тэрбумд хүрч, тэнцэл нь 6.1 тэрбум ам.долларын ашигтай гарлаа.
Монголбанкны Ерөнхийлөгч С.Наранцогт Төрөөс мөнгөний бодлогын талаар 2027 онд баримтлах үндсэн чиглэл батлах тухай тогтоолын төслийг өчигдөр УИХ-ын дарга С .Бямбацогтод өргөн мэдүүллээ.
Монгол Улсад инфляц өндөр түвшинд хэвээр байна. Наймдугаар сарын байдлаар жилийн инфляц улсын хэмжээнд 12.5 хувь байгаа нь энэ оны инфляцын зорилт болох 6±2 хувийн дээд хязгаараас нэлээд өндөр үзүүлэлт юм. Наймдугаар сард инфляц өмнөх сарынхаас 0.5 нэгж хувиар буурсан нь хүнсний бүлгийн, тэр дундаа махны үнийн өсөлт саарсантай голлон холбоотой. Гэхдээ хүнснээс бусад бараа, үйлчилгээний үнэ сүүлийн саруудад илүү эрчимтэй өсөж буй нь инфляцын дарамт эдийн засгийн бусад хэсэгт ч тархаж байгааг харуулж байна.
