Улаанбаатар дахь “Русский дом”-д “Их Ялалтын үйл хэрэгт Монгол Улсын оруулсан хувь нэмэр. Дайчин нөхөрлөлийн түүх” сэдэвт Түүхийн клубын ээлжит уулзалт зохион байгуулагдлаа.
Уулзалтын хүрээнд Монгол Улсын Батлан хамгаалах яамны Эрдэм шинжилгээний хүрээлэнгийн Цэргийн түүх судлалын төвийн захирал, түүхийн шинжлэх ухааны доктор, дэд хурандаа Н. Хүдэрбат лекц уншив.
Уулзалтаар Аугаа Эх орны дайны жилүүдэд Зөвлөлт Холбоот Улсыг дэмжихэд Монгол Улс, Монголын ард түмний оруулсан хувь нэмэр, Улаан армид үзүүлсэн тусламжийн түүх, Монгол Ардын Хувьсгалт Цэргийн үйл ажиллагаа, түүнчлэн хоёр ард түмний жинхэнэ дайчин нөхөрлөлийн тод жишээнүүдийн талаар хэлэлцэв.
Мөн фронтод илгээсэн тусламжийн талаар өгүүлэх архивын баримт, түүхэн гэрэл зураг, бодит баримт мэдээлэлд онцгой анхаарал хандуулав.
Клубын зочид Орос, Монголын хамтын түүхийн төдийлөн олон нийтэд танигдаагүй хуудсуудтай илүү дэлгэрэнгүй танилцаж, Дэлхийн хоёрдугаар дайны үйл явдлын талаарх түүхэн ой санамжийг хадгалан хамгаалах, үнэн бодит түүхийг хойч үедээ уламжлуулахын ач холбогдлын талаар санал бодлоо солилцов.
