Д.Яруу: Би алдартай жүжигчин болохыг мөрөөддөг

Төрийн шагналт, Урлагийн гавьяат зүтгэлтэн, хүүхдийн нэрт зохиолч Жамбын Дашдондог агсны нэрэмжит уран уншлагын “Уран жиргээ-2025” наадмыг улс орон даяар зохион байгуулж буй билээ. Тус уралдааныг цэцэрлэг, сургууль, дүүрэг, нийслэлийн гэсэн гурван үе шаттайгаар явуулдаг. Д.Яруу Сүхбаатар дүүрэгт өнгөрсөн сарын 30-31-нд зохион байгуулсан “Уран жиргээ”-гийн бага насны төрөлд тэргүүн байр эзэлсэн юм. Тэрбээр ерөнхий боловсролын зургаадугаар сургуулийн 4б ангид суралцдаг бөгөөд нийслэлийн хэмжээнд зохион байгуулах уралдаанд оролцох эрхээ ийнхүү авчээ. Түүнтэй ярилцсанаа хүргэе.

-Манай уншигчдад өөрийгөө танилцуулахгүй юу?
-Сайн байна уу, намайг Даваа­цэрэн­гийн Яруу гэдэг. Ам бүл дөрөв, аав минь хувиараа бизнес эрхэлдэг. Ээж, эгч хоёр минь ч хувийн компанид ажилладаг.

-“Уран жиргээ” наадамд оролцсон сэтгэгдлээсээ хуваалцаач.
-Тайзан дээр гараад сандарсан. Бэлт­гэл хийхдээ өгүүллэгээ тайван, удаан уншиж байсан хэрнээ яг тэмцээний үеэр хурдан уншчих шиг болсон. Өр­сөл­дөгч хүүхдүүд ч сайн байсан болохоор өөрийгөө тэргүүн байр эзэлнэ гэж бодоогүй. Гурав, хоёрдугаар байрын эз­нийг зарласны дараа “Би ч нэгдүгээр байрт шалгарна гэж байхгүй дээ” хэ­мээн бодоод амжсан шүү. Гэтэл нэг­дү­гээр байрт Д.Яруу гэж зарлахад нь итгэж чадахгүй л байсан.

-Ямар бүтээл сонгож, уран яруу уншсан бэ? 
-Ж.Дашдондогийн “Найз” өгүүл­лэ­гийг унш­сан. Энэ өгүүллэгийг өмнө нь цээ­жилчихсэн бай­сан л даа. Мэд­дэг уч­раас уншихад илүү амар. Бас нөхөр­лө­лийн үнэ цэнийн тухай өгүүл­дэг учраас надад их таалагддаг.

-Өмнө нь энэ уралдаанд оролцож байв уу?
-Энэ жил анх удаа оролцсон.

-Өгүүллэгээ хэдэн хоног бэлдэж, зүгшрүүлсэн бол?
-Драмын дугуйланд явдаг эгчтэйгээ  хоёр хоног бэлдсэн. Сая хэлсэнчлэн өгүүл­лэгээ өмнө нь цээжилсэн байсан бо­лохоор алдаагаа засаад оролцсон. Тэм­цээний үеэр манай гэр бүлийнхэн ирж ам­жаагүй болоод ч тэр үү, их сан­дар­лаа.

-Анх удаа оролцоод тэргүүн байр эзэлнэ гэдэг том амжилт шүү.
-Би Монголын хүүхдийн ордны драмын дугуйланд суралцаад хоёр жил болж байна. Ангидаа өдөр бүр шахам амны хайрцаг сайжруулах, шүлэг, өгүүл­лэг унших, хэл яриа хөгжүүлэх дасгал хийдэг. “Найз” өгүүллэгээ ч бас энд сурсан.

-Драмын ангийг сонгон суралцах болсон шалтгаан нь юу вэ?
-Би ирээдүйд алдартай жүжигчин бо­­лохыг мөрөөддөг. Тэр тусмаа инээд­мийн кинонд тоглоно гэж боддог. Ээж минь намайг их дэмждэг. Тиймээс дра­мын дугуйланг сонгон суралцаж байгаа.

-Яагаад алдартай жүжигчин болмоор санагдав?
-Алдартай хүмүүсийг шүтэн биш­рэгчид нь үргэлж дагаад л, тэдэнд га­рын үсгээ өгч байгааг нь харахад гоё санагд­даг. Бас хүн болгон таньдаг болохоор их мөнгө олдог байх гэж боддог.

-Аав, ээжтэйгээ хамт юу хийх дуртай вэ?
-Чөлөөт цагаараа аавтайгаа шатар тог­лодог. Одоохондоо хожигдсоор л бай­на. Бас бассейнд хамт хичээллэж эхэл­сэн. Би ангидаа намхандаа ордог. Усанд сэлэлтээр хичээллэвэл өндөр болдог гэж аав дандаа хэлдэг. Бас би ээжийг хоолоо хийж байхад нь туслах дуртай. Бид зун гэр бүлээрээ аялалд явдаг. Ирэх зун Хятадын “Disneyland” рүү явахаар төлөвлөсөн.

-Нийслэлийн “Уран жиргээ-2025”-д өрсөлдөх үзүүлбэрээ сон­госон уу?
-Хараахан сонгож амжаагүй л байна. “Тэнэг”, эсвэл “Ээж тандаа” гэсэн хоёр шүл­гийн аль нэгийг нь унших бодолтой байгаа.

-Эл тэмцээнд оролцох гэж буй хүүхдүүдэд хандаж юу хэлмээр байна?
-Чадахгүй гэж өөрийгөө битгий го­­лоорой. Хэрвээ шүлэг унших гэж бай­­гаа бол үгээ тод, чанга хэлээрэй. Өгүүл­лэгийн тухайд дүрээ сайн бүтээх нь чухал санагдсан. Тайзан дээр га­рах­даа бэлтгэл хийж байгаа юм шиг л унших хэрэгтэй. Та нар чадна аа.

А.Дөлгөөнзул