О.Наранзул ой тогтоолтын улсын хошой аваргаар тодров 

Монголын оюун ухааны академи, Оюуны спортын менежмент байгуул­лага­тай хамтран оюуны спортын аварга шал­гаруулах олон төрөлт тэмцээнийг зо­хион байгуулж, дүнгээ гаргажээ. Энэхүү наадмын нэг төрөл болох 16 дахь удаагийн ой тогтоолтын улсын аварга шал­гаруулах тэмцээнд 25 клубийн шил­дэг 117 тамирчин харааны болон сонс­голын ой тогтоолт шалгасан 10 төрлөөр өрсөлдсөн байна. Бага, өсвөр, насанд хүрэгчдийн ангилалд ухаанаа уралдуулсан, УАШТ-д олон улсын цолтой 17 тамирчин оролцжээ. Энэ үзүүлэлт нь тэмцээний түүхэн дэх хамгийн олон цолтой тамирчин оролцсон тохиолдол болж, өрсөлдөөн улам ширүүссэн гэнэ. 

Бага насны ангилалд “Classicmind” клу­бийн тамирчин Г.Сондор 5910, өсвөрийнхөд олон улсын ихмастер, дэл­хийн аварга О.Наранзул 9351, насанд хүрэгчдийн тэмцээнээс өсвөрийн дэл­хийн аварга, олон улсын их мастер Ц.Оюун-Эрдэнэ 6488 оноогоор тус тус тэргүүлжээ. Харин тэмцээний 10 төрлийн нийлбэр оноогоор О.Наранзул тэргүүлж, аваргын цом хүртэн улсын хошой аварга болжээ. Тэрбээр мөн 15 минутын хугацаанд 1005 хийсвэр зураг цээжилж, улсын рекорд шинэчлэн тогтоосон байна.

Ч.Туяа