Геопарк гэдэг нь дэлхийн үүсэл гарвал, хөрс чулуулаг, үлэг гүрвэл зэрэг эртний амьтан, ургамлын ховор олдвор бүхий байгалийн өвөрмөц тогтоцтой, түүх, соёлын дурсгалт газруудыг багтаасан өргөн уудам бүс нутаг байдаг. Өөрөөр хэлбэл, дэлхийн олон сая жилийн түүхийг өгүүлэх геологийн ховор өвийг байгаа газарт нь хадгалж, судлах зориулалттай задгай байгалийн музей юм.
ЮНЕСКО нь геологийн өвийг хамгаалах, шинжлэх ухааны ач холбогдлыг олон нийтэд таниулах зорилгоор Дэлхийн геопаркуудын хөтөлбөрийг 2015 оноос хэрэгжүүлж эхэлсэн түүхтэй. Манай улс 2018 оноос эл хөтөлбөрт хамрагдах бэлтгэлээ эхлүүлж, геопарк болгон хөгжүүлэх боломжтой газар нутгийг шат дараатай судалсаар иржээ. Шинэ геопаркийг цаашид ЮНЕСКОийн Дэлхийн геопаркуудын сүлжээнд нэгтгэхээр төлөвлөж буй бөгөөд үүнд бүртгүүлэх үйл явц дунджаар 5-10 жил үргэлжилдэг аж. Иймд геологийн өвийн үнэлгээ, хадгалалт хамгаалалт, төр болон нутгийн иргэдийн идэвхтэй оролцоо, үндэсний хэмжээний дэмжлэг, байгальд ээлтэй менежмент, олон улсын хамтын ажиллагаа зэрэг нарийн шалгуур үзүүлэлтийг хангах шаардлагатай гэнэ. Ингэснээр бид геологийн өвөрмөц өв, байгалийн хосгүй тогтцыг олон улсад илүү ихээр таниулах боломжтой бүрдэх юм байна.
У.Сүрэн
