“Бэлтэсмөрөн”-гийн гэх хэргийн шүүх хурлыг энэ сарын 26 хүртэл завсарлууллаа
Олон шатлалт маркетинг, пирамид тогтолцооны луйврын аргаар Хөвсгөл аймгийн 2595 иргэнээс 45.4 тэрбум гаруй төгрөг залилан авч, мөнгө угаасан хэрэгт холбогдсон “Бэлтэсмөрөн” ХХК-ийнхны хэргийг тус аймаг дахь Эрүүгийн хэргийн анхан шатны шүүхэд өнгөрсөн мягмар гарагт 11 дэх өдрөө хэлэлцлээ. Уржигдар улсын яллагч, хохирогч, шүүгдэгч нарын өмгөөлөгчдийн хоёрдугаар санал, дүгнэлт, есөн шүүгдэгчийн эцсийн үгийг сонсож дуусаад шүүхийн хэлэлцүүлэг өндөрлөв. Улмаар шүүх бүрэлдэхүүн шүүгдэгч нарын гэм буруутай, эсэхийг хэлэлцэж зөвлөлдөхөөр энэ сарын 25 хүртэл хурлыг завсарлуулав.
2024-06-13
Тулааны урлагийг таниулах гэрэл зургийн уралдаан зарлажээ
ЮНЕСКО-гийн Залуучуудын хөгжил, оролцоог дэмжих олон улсын тулааны урлагийн төвөөс “Тулааны урлаг-2024” олон улсын гэрэл зургийн уралдаан зарлажээ. Энэ нь тулааны урлагийн үнэт зүйлсийг олон нийтэд сурталчлан таниулах зорилготой юм байна. Сэдэв нь “Дэлхийг нэгтгэх тулааны урлаг” аж. Оролцогчид гэрэл зургаараа дамжуулан тулааны урлагийн үнэт зүйл болох тэсвэр хатуужил, шударга, хүртээмжтэй байдал зэргийг илэрхийлэх ёстой гэнэ. Уг уралдаанд нас, хүйс, үндэстэн харгалзахгүйгээр оролцох боломжтой тул уран бүтээлчид, гэрэл зураг сонирхогчид идэвхтэй оролцохыг ЮНЕСКО-гийн Монголын үндэсний комиссоос уриалсан байна. Өдгөө оролцогчдын бүтээлийг хүлээн авч буй бөгөөд шилдгүүдийг ирэх наймдугаар сарын 30-нд шалгаруулах нь. Шилдэг бүтээлийн шагнал нь таван сая вон аж.
2024-06-12
Өв соёлоо таниулсан хөтөлбөртэй зуслангуудыг дэмжинэ
Хүүхдийг амьдрах ухаанд сургах, монгол өв соёл, уламжлалаас суралцахад чиглэсэн хөтөлбөртэй зуслангуудын үйл ажиллагааг Хүүхэд, гэр бүлийн хөгжил, хамгааллын ерөнхий газар (ХГБХХЕГ)-аас дэмжих нь. Ийм хөтөлбөртэй зуслангуудын хүсэлтийг хүлээн авч, шаардлага хангасанд нь 10 сая төгрөгийн дэмжлэг олгох гэнэ. Үүний тулд хүүхдийн зуслангуудын хөгжлийн хөтөлбөрүүдтэй танилцаж, шалгах юм байна. Тэдгээрээс өв соёл, уламжлалаа таниулахад чиглэсэн шилдэг хөтөлбөрүүдийг шалгаруулах гэнэ. Оролцогчдын материалыг маргааш хүртэл хүлээн авна.
2024-06-12
Улаан загалмайн Хүүхэд, залуучуудын хөдөлгөөнийхөн цугларна
Монголын Улаан загалмай нийгэмлэгийн 85 жилийн ойг угтан Хүүхэд, залуучуудын хөдөлгөөний “Үндэсний зуслан цугларалт-2024”-ийг“Найрамдал” зусланд энэ сарын23-30-нд зохион байгуулна. Улаан загалмай нийгэмлэгээс Хүүхэд, залуучуудын хөдөлгөөний гишүүд хоорондын хамтын ажиллагааг энэхүү арга хэмжээгээр дамжуулан дэмжихийг зорьдог аж.
2024-06-12
Монгол хэлний олимпиадад 2669 бүлэг оролцлоо
“Зөв сайхан бичигтэн анги хамт олон” монгол хэлний олимпиадыг нийслэлийн Боловсролын газраас зохион байгууллаа. Нийслэлийн ерөнхий боловсролын сургуулийн 3-5 дугаар ангийн 2669 бүлгийн сурагчид үүнд оролцсон байна. Тэдгээрээс гуравдугаар шатанд 144 бүлэг “Зөв сайхан бичигтэн хамт олон”-оор шалгарчээ. Гуравдугаар ангийн ангилалд 30 дугаар сургуулийн Ц.Цэрэнбат багшаар удирдуулсан 3А-гийнхан тэргүүлсэн байна. Дөрөвдүгээр ангийнхад нь 45 дугаар сургуулийн Д.Отгонжаргал багштай 4А бүлгийнхэн шилдгээр шалгарчээ. “Шинэ үе” сургуулийн 5В ангийн сурагчид нийслэлийн тавдугаар ангийн сурагчдаас монгол хэлний мэдлэгээрээ илүүрхлээ.
2024-06-12
Б.ТЭРГЭЛ: Шагнал авсны дараа намайг авьяастай биш, азтай гэж их ярьсан
Сүүлийн жилүүдэд Монголын кино урлагт онцгой, “анхны” гэх тодотголтой үйл явдал цөөнгүй тохиожээ. Амьсгаа дарам дүрслэл, өгүүлэмжтэй, сэтгэл сэвсэлзүүлсэн “Сэр сэр салхи” кино их гэгээн мөртэй. 80 дахь удаагийн Венецийн олон улсын кино наадмын “Оризонти” хэсэгт шалгарч, шилдэг эрэгтэй гол дүр, “Asian Film Awards 2024” наадмын шилдэг шинэ жүжигчний шагнал хүртсэн Б.Тэргэл уг бүтээлээр овоглодог. Тэр яг цагтаа гарч ирсэн. Ингээд уншигч танд түүнтэй ярилцсанаа хүргэе.
2024-06-12
Д.Энх-Од мастер ангилалд түрүүлж, Азийн аварга боллоо
Казахстан улсын Алматы хотод болсон дугуйн спортын Азийн АШТ-ий өсвөр үе, залуучууд, элит ангилалд Монголын үндэсний шигшээ багийн 12, мастер ангилалд 10 тамирчин хурд сорив. Тэднээс мастер ангиллын 60-64 насныхны эрэгтэйчүүдийн цуваа гараатай уралдаанд ОУХМ Д.Энх-Од түрүүлж, Азийн аваргаар тодорлоо. Эл насныхны ангилалд өрсөлдсөн Г.Анхбаяр мөнгө, Д.Энхтайван хүрэл медаль гардсан юм. Түүнчлэн 65-69 насныхны ангилалд спортын мастер Г.Дэлгэрсайхан шагналтнуудын тоог ахиулж хүрэл, 70-79 насныхад ОУХМ Т.Пүрэвдорж мөнгөн медаль зүүжээ.
2024-06-12
“Ibiza” хөгжмийн фестивалийг 10 дахь жилдээ зохион байгуулах нь
“Ibiza” хөгжмийн фестивалийг энэ сарын21-нд Монгол шилтгээнд зохион байгуулахаар болжээ. Их хотын соёлтой залуусын эрх чөлөөний бэлгэдэл болгон 10 дахь жилдээ хийх “Ibiza” хөгжмийн фестивалийн энэ удаагийн бүрэлдэхүүнд “Татар” хамтлаг, дуучин Seryoja буюу Ц.Мөнхбаяр, реппер Roockie (У.Мөнхбагана), Б.Арманзэрэг уран бүтээлч багтжээ. Түүнчлэн урилгаар Дубайн алдарт дижей Magistro ирэх юм байна.
2024-06-12
Хөвсгөл, Сүхбаатар аймагт ой, хээрийн түймэр гарчээ
Хөвсгөл, Сүхбаатар аймгийн нутагт энэ сарын 10-нд ой, хээрийн түймэр гарчээ. Тухайлбал, Хөвсгөлийн Жаргалант сумын Харгана багийн нутагт ой, хээрийн түймэр гарч, аймгийн Онцгой байдлын газрын Галт сум дахь Гал түймэр унтраах, аврах 76 дугаар ангийн алба хаагчид, Жаргалант сумын ойн мэргэжлийн ангийнхан, орон нутгийн иргэд хамтран энэ сарын 10-ны орой бүрэн унтраасан байна. Түймэрт хоёр га талбай шатсан гэнэ.
2024-06-12
Цэцийн хуралдааныг шууд дамжуулна
Үндсэн хуулийн цэцийн нийт гишүүний хуралдаанаар Цэц, түүний Тамгын газрын үйл ажиллагааг боловсронгуй болгох талаар хэлэлцэж, тодорхой саналууд дэвшүүлжээ. Ялангуяа Цэцийн үйл ажиллагаа олон нийтэд нээлттэй, ил тод байх, үнэн бодит мэдээллээр хангахад онцгой анхаарахыг гишүүд чухалчилсан гэнэ. Үүнтэй холбоотой зарим арга хэмжээг Цэц авч хэрэгжүүлж эхэлсэн бөгөөд үйл ажиллагааныхаа талаарх мэдээ, мэдээллийг өөрийн байгууллагын цахим хуудсанд тогтмол байршуулж, олон нийтийн сүлжээнд албан ёсны хаягаар түгээж эхэлсэн байна. Мөн Цэцийн дунд, их суудлын хуралдааны явцыг шууд дамжуулахаар техник, зохион байгуулалтын бэлтгэл ажлыг хангаж буй аж.
2024-06-12
Үерт өртсөн аж ахуйн нэгжүүдийн төлөөлөл хохирлыг нь барагдуулахыг шаардав
Их хэмжээний аадар борооны улмаас усанд автсан аж ахуйн нэгжүүдийн төлөөлөл төв талбайд өчигдөр тайван жагсаал хийж, холбогдох албаныханд шаардлага хүргүүллээ. Тодруулбал, өнгөрөгч оны 7-8 дугаар сард нийслэлийн 70 орчим хороо, 200 гаруй орон сууц, хашаа үерт өртөж, 40 мянга гаруй өрх цахилгаангүй болж, иргэд эрүүл мэнд, эд хөрөнгөөрөө хохирсон билээ. Түүнээс хойш 10 гаруй сар өнгөрсөн ч иргэд, аж ахуйн нэгжүүдийн хохирлыг барагдуулаагүй байна. Тэдний төлөөлөл тухайн үед хохирлын хэмжээ, мөнгөн дүнгээ баримт бичигтэй нь холбогдох байгууллагад хүргүүлсэн ч одоо хүртэл ямар ч арга хэмжээ авч, хариу өгөөгүйг онцоллоо.
2024-06-12
Энэ он гарснаас хойш 12 хүн ДОХ-оор өвчилснийг тогтоожээ
Манай улсад энэ оны таван сард 12 хүн ДОХ-оор өвчилснийг тогтоожээ. Эдгээрээс тал хувь буюу зургаан тохиолдлыг өнгөрсөн сард илрүүлсэн нь нэлээд өндөрт тооцогдож байна. Үүний өмнөх буюу дөрөвдүгээр сард нэг хүн ХДХВ-ийн халдвар авсныг тогтоож байсан аж. Манай улсад ХДХВ-ийн халдвар авсан нийт хүний тоо одоогоор 380-д хүрчээ. Уг халдварын улмаас нас барсан тохиолдол энэ онд бүртгэгдээгүй гэнэ.
2024-06-12
Шударга, ёс зүйтэй өрсөлдөхийг ХЭҮК-оос зөвлөлөө
УИХ-ын сонгуулийн сурталчилгаа албан ёсоор эхэлсэнтэй холбоотойгоор Хүний эрхийн үндэсний комиссоос таван зүйл бүхий зөвлөмж гаргажээ. Сонгуулийн ил тод байдлыг хангах ажлын хүрээнд сонгогчдын бүртгэл тойрсон зөрчил, маргааныг шуурхай арилгах, ажиглагчдыг ялгаварлахгүй байх, санал хураах төхөөрөмжийн ажиллах горим, санал хураалтын үнэн зөв байдлыг хянах механизмын талаарх мэдээлэл, сурталчилгааг өргөн хүрээтэй явуулахыг тэд зөвлөжээ. Мөн сонгуулийн оролцоог хангах, сонгогчдыг ялгаварлахгүй байх, ялангуяа хөгжлийн бэрхшээлтэй сонгогчдын санал өгөх боломжийг бүрдүүлэх ёстой гэсэн байна.
2024-06-12
Зудад өртсөн хүүхдүүдэд дасгал ажлын дэвтэр хүргэнэ
НҮБ-ын Хүүхдийн сангийн дэмжлэгтэйгээр “Миний анхны сурах бичиг” дасгал ажлын дэвтэр хэвлүүлээд буйгаа Боловсролын ерөнхий газраас мэдээлэв. Эхний ээлжид 1000 дэвтэр хэвлэсэн бөгөөд тэдгээрийг Архангай, Дорнод, Дорноговь, Дундговь, Говьсүмбэр, Хэнтий, Сүхбаатар, Төв, Завхан зэрэг аймгийн өвөлжилт хүндэрсэн, зудад өртсөн сумууд дахь 4-5 настай хүүхдүүдэд хүргэх гэнэ. Бага насны хүүхдийн хөгжил, боловсролын талаарх судалгаа дүн шинжилгээ, дэвшилтэт арга зүйд тулгуурлан энэхүү дэвтрийг гаргаснаараа онцлогтой аж. Сургуулийн өмнөх боловсролын сургалтын хөтөлбөрийг хэрэгжүүлэх, эцэг, эх, асран хамгаалагчид хүүхдээ сургуульд амжилттай бэлтгэхэд туслах мэргэжлийн баг үүнийг боловсруулжээ. Мөн бусад хүүхэд ч уг дэвтрийг ашиглах боломж бүрдүүлэхийн тулд цахим орчинд байршуулаад буй юм байна.
2024-06-11
Азийн инновац, соёлын форум зохион байгуулах нь
“Азийн инновац, соёлын форум-2024” энэ баасан гарагт болно. Уг хэлэлцүүлэг нь манай улсын соёлын үнэт зүйлсийг сурталчлан таниулж, олон улсын арга туршлага, технологиос суралцах, хамтран ажиллах боломжийг нээх зорилготой аж. Хэлэлцүүлгийн үеэр виртуал ертөнцөд суурилсан нийгмийн сүлжээ “Guyuk metaverse”-ийн үүсгэн байгуулагч, гүйцэтгэх захирал А.Энхбаяр “Монгол дахь метаверсийн өнөөгийн чиг хандлага” сэдвээр илтгэл хэлэлцүүлнэ. Мөн Ерөнхийлөгч асан Н.Энхбаяр “Монголын түүх ба соёл” сэдвээр илтгэл тавих юм байна. Харин гадаадаас Япон, Хятад улсын төлөөллүүд оролцож, техник, технологи, метаверс, виртуал орчны талаар илтгэл хэлэлцүүлж, сэтгэгдлээ хуваалцах гэнэ. Энэхүү хэлэлцүүлгийг Соёлын яам, БОАЖЯ, Монголын анимэйшний холбоо хамтран зохион байгуулах юм.
2024-06-11
Гудамжны хоолны үйлчилгээ эрхлэгчдэд зөвшөөрөл олгосон ч цахилгааныг нь холбосонгүй
Хоол хүнс бол тухайн улс үндэстний соёлыг илэрхийлэх томоохон хүчин зүйлсийн нэг. Тиймдээ ч уламжлал, соёлтой нь салшгүй холбоотой. Зарим улс орны хувьд гудамжны хоол нь нэрийн хуудас болтлоо хөгжсөн нь ч бий. Тухайлбал, БНСУ, БНХАУ, Япон гэх мэт Азийн оронд энэ соёл нийтлэг ажиглагддаг. Манай улс ч үүнтэй хөл нийлүүлэхийг хичээж буй. Уламжлалт хоол болох хуушуур, буузнаас эхлэн бусад орны үдэн, жантай гоймон зэргийг ч манай үйлчилгээ эрхлэгчид хийж, иргэддээ хүргэж, дэлхийд гудамжны хоолны соёлыг түгээсээр багагүй хугацаа үджээ. Өдгөө хүрээгээ улам л тэлж, хаа нэг харагддаг байсан өнгө өнгийн бүхээгтэй түргэн хоолны машинуудаар нийслэлийг чимэх болсон. Street food буюу гудамжны хоолны соёл Монголд нутагшихад юу саад болж буй болон иргэд үүнийг хэрхэн хүлээж авч буйг сурвалжиллаа.
2024-06-11
“Монголын нууц товчоо”-ыг брайл үсгээр хэвлэжээ
Харааны бэрхшээлтэй иргэдэд зориулан брайл, кирилл бичгээр “Монголын нууц товчоо”-ыг бүтээжээ. Мөн харааны бэрхшээлтэй иргэдэд зориулсан ярьдаг хувилбарыг ч гаргасан байна. Энэхүү бүтээлийг Үндэсний номын сангийн шинэ салбарт өчигдөр нээлээ. Соёлын яамны санхүүжилтээр Чингис хааны өв, соёлын хүрээлэнгээс уг номыг эрхлэн гаргажээ. Үүгээр харааны бэрхшээлтэй иргэдэд зориулсан номын хүрэлцээг нэмэгдүүлэхийг зорьсон аж. Мөн монголчуудын бахархалт үеийн түүх, эзэн богд Чингис хааны үлдээсэн өв соёлыг түгээн дэлгэрүүлэх зорилготой гэнэ.
2024-06-11
Чойжин ламын сүм музейг сэргээн засварлах ажил 50 хувьд хүрэв
Чойжин ламын сүм музейг сэргээн засварлах ажил 50 хувьтай үргэлжилж байгааг Соёлын яамнаас мэдээлэв. Уг ажлын хүрээнд тус музейн Хаалган, Махранз сүм зэрэг гол байгууламжийг эх төрхөөр нь сэргээн засварлаж буй аж. Ингэхдээ соёлын өвийн хадгалалт, хамгаалалтын шинжлэх ухаан, сэргээн засварлалтын технологийн суурь судалгаанд үндэслэж байгаа гэнэ. Мөн музейн барилгын ур хийц, дүр дүрслэлийн анхны хэлбэр төрхийг алдагдуулахгүйгээр засахаар төлөвлөжээ. Засварын ажлыг ирэх наймдугаар сард багтаан дуусгах гэнэ. Ташрамд дурдахад, Чойжин ламын сүм музейг 300 гаруй уран дархан1904-1908 онд барьж байжээ.
2024-06-11
"MongolZ" багийнхан олон улсын тэмцээнд аваргаллаа
Цахим спортын нэгдүгээр түвшний тэмцээнд 14 жилийн дараа Азийн баг шилдгээр тодорсон тохиолдол нь энэ болж, шинэ түүхэн амжилт гаргалаа. Аваргаар тодорсноор “MongolZ” багийнхан 200 000 ам.долларын эзэн болов. Мөн тус багийн тамирчин Б.Өсөхбаяр буюу “910” Азиас анх удаа HLTV сайтын MVP буюу шилдэг тоглогчоор шалгарлаа. Энэхүү сайт нь цахим спортын тоглогчдын чансааг тодорхойлдог юм байна. Дээрх тэмцээний аваргыг энэ сарын 9-10-нд шилжих шөнө шалгаруулсан. “MongolZ”-ийнхэн үүний дараа Швед улсад энэ сарын 14-16-нд зохион байгуулах “ESL сhallenger jonkoping-2024” тэмцээнд оролцох нь. Тэд үүнээс өмнө “MESA nomadic masters-2024” тэмцээний аварга болсон билээ.
2024-06-11
