ЗГХЭГ-аас ЗТЯ-ны албан тушаалтанд хариуцлага тооцох шаардлага хүргүүлжээ 

Зам, тээврийн яам (ЗТЯ), түүний харьяа агентлаг болох Иргэний нисэхийн ерөнхий газарт авлигын гэмт хэрэг удаа дараа гарсаар буй. Заримыг нь шүүх шийдвэрлэж, нэг хэсэгт нь мөрдөн шалгах ажиллагаа явуулж байгаа юм. Үүнтэй холбоотойгоор манай сонин энэ оны тавдугаар сарын 12ны дугаартаа “ИНЕГ-т авлигын эрсдэл өндөртэйг мэдээгүй л байна уу, Б.Дэлгэрсайхан сайд аа” нийтлэл бичиж уншигчдад хүргэсэн. Түүнд “ИНЕГ нь 720.5 сая гаруй төгрөгөөр үнэлэгдэх зургаан тээврийн хэрэгслийг ЗТЯ, ИНҮТ болон орон нутаг дахь нисэх буудалд үнэ төлбөргүйгээр ашиглуулж буй аж. Тэдгээрийн дулаан зогсоолын зардалд өнгөрсөн өвөл гурван сая гаруй төгрөг зарцуулсан гэнэ. Нэг машинд гурван сая уу, эсвэл зургууланд нь нийт ийм хөрөнгө зарцуулсан уу гэдэг нь тайлангаас тодорхой харагдахгүй байгаа юм. 

Уг нь Төсвийн тухай хуулийн 16.5.5-д “Батлагдсан төсвийг зориулалтын дагуу зарцуулах”, Төрийн хэмнэлтийн тухай хуулийн 6.1-д “Улсын Их Хуралд ажлаа шууд хариуцан тайлагнадаг байгууллагын тэргүүн дэд, дэд, орлогч дарга болон дэд сайд, яамны Төрийн нарийн бичгийн дарга, Засгийн газрын агентлагийн дарга, төрийн болон орон нутгийн өмчит хуулийн этгээдийн захирал, төсвийн байгууллагын дарга хот дотор албан тушаалын суудлын автомашин ашиглахыг хориглоно” гэж заасныг зөрчсөн үйлдэл юм. Тухайлбал, ИНЕГ-ын үндсэн хөрөнгөд бүртгэлтэй 9113 УКН гэсэн цэнхэр дугаартай тээврийн хэрэгслийг ЗТЯ-ны Иргэний нисэхийн бодлогын хэрэгжилтийн газрын даргаар ажиллаж буй нэгэн 150 км-ийн хязгаар­тай­гаар шатахуун, дулаан зогсоолын төлбөр зэргийг гаргуулан ашиглаж буйг аудитын байгууллагынхан тогтоосон юм байна. Түүгээр ч зогсохгүй хувийнхаа жолоочийн цалинг ИНЕГ-аас гаргуулж байсан...” гэдгийг тодорхой дурдсан. ЗТЯ-ы уг газрын даргын албан үүргийг З.Туяа гэх хүн 2025 оны наймдугаар сараас түр орлон гүйцэтгэж өнөөдрийг хүрч буй аж. Тэрбээр энэ албан тушаалд томилогдсоноосоо хойш өнөөг хүртэл ИНЕГ-ын үндсэн хөрөнгөд бүртгэлтэй автомашин дайчлан гаргуулсан нь аудитын дүгнэлт, албан шаардлагаар тодорхой болсон байна. Хуулийн хэд хэдэн заалт зөрчин албаны тээврийн хэрэгсэл ашиглах эрхгүй атлаа унаад зогсохгүй жолооч Б-ын цалинг ИНЕГ-ын харьяа Иргэний нисэхийн үндэсний төвийн Газрын тусгай үйлчилгээний авто баазын зардлаас гаргуулдаг байж. АТГ-аас манай нийтлэлд дурдагдсан уг асуудалтай холбогдуулан хэрэг бүртгэлтийн хэрэг нээн шалгаад хариуцлага тооцуулах тухай албан бичиг Засгийн газрын хэрэг эрхлэх газар (ЗГХЭГ)-т хүргүүлжээ. Харин ЗГХЭГ-аас уг албан бичгийг ЗТЯ руу шилжүүлсэн байна.