АНУ-ын Геологийн судалгааны албаны мэдээлснээр газар хөдлөлтийн голомтод барилга, байгууламж олноор нурж, дэд бүтэц сүйрсний улмаас үүрэн холбооны станцууд болон цахилгаан дамжуулах шугамууд бүрэн тасарчээ. Улмаар Каракас хотын метро, галт тэрэг болон байгалийн хийн шугамуудыг аюулгүй байдлын үүднээс зогсоосон байна. Мөн тус улсыг гадаад ертөнцтэй холбодог цорын ганц агаарын хаалга болох “Симон Боливар” олон улсын нисэх онгоцны буудал нурангид өртсөн тул тодорхойгүй хугацаанд хаасан аж. НҮБ-ын Хөгжлийн хөтөлбөрөөс гаргасан урьдчилсан дүгнэлтээр эл гамшгийн шууд хохирол 6.7 тэрбум ам.долларт хүрсэн тул Венесуэлийн Засгийн газар олон улсаас тусламж хүсжээ.
Венесуэлд сүүлийн жилүүдэд эдийн засгийн хямрал нүүрлээд байсан бөгөөд байгалийн гамшгийн эсрэг хариу арга хэмжээ авах, эрэн хайх ажиллагаа явуулах техник хангамж, нөөц боломж хомс гэнэ. Одоогоор АНУ, Бразил, Франц тэргүүтэй 17 орны аврах тусгай баг болон хөдөлгөөнт хээрийн эмнэлгүүд гамшгийн бүсэд очиж, амьд үлдсэн хүмүүсийг эрэн хайж буй юм. Тухайлбал, Колумбийн Батлан хамгаалах яамнаас мэдээлснээр тус улсын “USAR COL-1” эрэн хайх, аврах багийнхан нурангин доор 70 цаг болсон 11 настай хүүг эсэн мэнд гаргажээ.
Э.Сүйлэн
