Шатахуун тээвэрлэгч цистерн дэлбэрч хоёр хүн түлэгджээ
Сонгинохайрхан дүүргийн 22 дугаар хорооны нутаг, Тахилтын аманд үйл ажиллагаа явуулдаг “Өсөх тээвэр” ХХК-ийн хашаанд цистерн дэлбэрч хоёр хүн түлэгджээ. Нийслэлийн ерөнхий боловсролын 122 дугаар сургуулийн дэргэд байдаг тус компанийн хашаанд “SCANIA P400” загварын хүнд даацын шатахуун тээвэрлэгч ачааны автомашины ёмкостийг гагнуурчин Т гагнаж байтал дэлбэрсэн гэнэ. Үүний улмаас гагнуурчин Т, жолооч Б нар түлэгдсэн хэргийг Сонгинохайрхан дүүргийн Цагдаагийн газрын I хэлтэст үргэлжлүүлэн шалгаж байна.
2024-06-14
Сонгуульд өрсөлдөгчид оюуны өмчийн хулгайгаа зогсооё
УИХ-ын ээлжит сонгуулийн сурталчилгаа эхэлж, энд тэнд уулзалт, хурал болж байна. Бас нэр дэвшигчид цахим орчинд өөрсдийгөө сурталчилсан дүрс бичлэг, зураг байнга оруулах болсон. Сурталчилгаагаа хэрхэн хийх нь тэдний эрх. Гэхдээ сурталчилгаандаа бусдын уран бүтээлийг зөвшөөрөлгүйгээр ашиглаж, оюуны өмчийн хулгай хийгээд буйг нь анхаарахгүй өнгөрч болохгүй. Хэд хэдэн нам сурталчилгаандаа ийм зөрчил гаргаж, тухайн уран бүтээлчид төдийгүй олон нийтийн дургүйцлийг хүргэв.
2024-06-14
Эрхээ хасуулсан эмэгтэй согтуугаар дахиж автомашин жолоодоод онхолдов
Налайх дүүргийн нутаг, Тэрэлжийн давааны замд өнгөрсөн мягмар гаргийн үдэш зам тээврийн осол гарч, суудлын автомашин онхолджээ. Тус дүүргийн Цагдаагийн хэлтсийнхэн хэргийн газарт ажиллахад тухайн тээврийн хэрэгслийг Архангай аймгийн харьяатай Л.О гэдэг эмэгтэй согтууруулах ундаа хэрэглэсэн үедээ жолоодож яваад осолд өртөн гэмтсэн байна. Тэрбээр өмнө нь жолоодох эрхээ хасуулсан нэгэн байсан гэдгийг эх сурвалжууд мэдээлэв.
2024-06-14
Улаанбаатар хотын 34 900 га талбай усанд автах магадлалтай
Нийслэлийн ИТХ-ын ээлжит бус XX хуралдаан өчигдөр боллоо. Улаанбаатар хотын хэмжээнд үер, усны гамшгаас урьдчилан сэргийлэх чиглэлээр хэрэгжүүлж буй ажлуудын талаар эл хурлаар хэлэлцэв. БХБЯ болон нийслэлийн ЗДТГ-ынхан хамтран Улаанбаатар хотын үерийн эрсдэлийн үнэлгээг гаргасан аж. Нийслэлд 1966 оныхтой дүйх хэмжээний үер болбол Туул гол орчмын 3200 га суурьшлын бүсээс эхлээд Төмөр зам, Дунд гол, “ДЦС-4”, Төв цэвэрлэх байгууламж усанд автах эрсдэлтэй гэсэн дүн уг үнэлгээгээр гарсан аж. Мөн 34 900 га талбай нэг метрээс дээш гүнтэй усанд автах магадлалтай гэнэ. Үүнтэй холбоотойгоор хотын үерийн байгууламжуудыг сайжруулах шаардлагатайг төлөөлөгчид онцолсон юм.
2024-06-14
Б.Отгон-Өлзий гран при төрөлд аваргаллаа
ӨМӨЗО-ы Улаан хад аймгийн Улаанбутанд зохион байгуулсан, морьт харвааны цөл хээрийн бүсийн дэлхийн аварга шалгаруулах олон улсын нээлттэй тэмцээнд долоон орны 60 гаруй тамирчин долоон төрөлд өрсөлдсөн. Авьяас мэдрэмж, хурд, ур чадвараа сорьсон тэмцээнд (1-6 төрөл) нийлбэр оноогоор шилдгүүдээ шалгарууллаа. Монголын морьт харваачдаас “Хан Монгол” клубийн тамирчин, Азийн аварга, ДАШТ-ий хошой мөнгөн медальт Б.Отгон-Өлзий гран притөрөлд түрүүлэв. Бөмбөг намнаад “Жүрхэн”-ий харваачдаас Э.Төвшинтөгс, цуваа таван байныхад Ц.Тэмүүжин (“Хан-Монгол”) тэргүүн байрт шалгарсан байна.
2024-06-13
Эх орондоо хошой хүрэл медальтай ирэв
Казахстанд болсон, бадминтоны өсвөр үеийнхний төв Азийн аварга шалгаруулах тэмцээнд манай тамирчид анх удаа оролцлоо. Багийн болон ганцаарчилсан төрөлд зургаан улсын 56 тамирчин өрсөлдсөн. Манай 15, 17 хүртэлх насныхан Тажикистан, Киргизийн тамирчидтай таарсан юм. Эрэгтэйчүүдийн хос тоглолтод17 хүртэлх насныхнаас Ү.Өсөх-Ирээдүй, О.Түвшин нар шагналын салхи хагалж, хүрэл медалийн болзол хангав. Ах нарынхаа амжилтыг үргэлжлүүлж, 15 насныхнаас холимог хосын төрөлд Ц.Энхлэн, Х.Дөлгөөн нар мөн III байрт шалгарч, медалийн тавцанд зогссон юм. Энэ удаагийн тэмцээнээс Монголын баг тамирчид эх орондоо хошой хүрэл медальтай ирэв.
2024-06-13
БНСУ-ын дасгалжуулагчид тамирчдын бэлтгэлтэй танилцаж байна
Говь-Алтай аймаг дахь “Сутайн бор” клубийнхний урилгаар БНСУ-ын Сөүл хотын cпорт авиралтын төвийн ерөнхийлөгч Чо Кю Бок, “Attack сamp general trading” компанийн гүйцэтгэх захирал Ким Нак Cо нар Улаанбаатарт хүрэлцэн иржээ. Тэднийг тус клубийн Удирдах зөвлөл, дасгалжуулагч, тамирчид угтан авснаар Олон улсын уулчдын холбооны Залуучуудын комиссын төлөөлөлтэй уулзав. Тэд уулзалтын дараа дээрх аймгийн Тонхил сумыг зорьж, манай мөсөнд авиралт, спорт авиралтын тамирчид зуны бэлтгэлээ хэрхэн хийж байгаатай танилцлаа.
2024-06-13
Шилдгээр шалгарсан тамирчид ДАШТ-д өрсөлдөнө
Дасгалжуулагч, ОУХМ Ж.Загасын нэрэмжит модон бөмбөгийн УАШТ Төв аймгийн Зуунмод сумд боллоо. Тус тэмцээнд эрэгтэйчүүдийн 10, эмэгтэйчүүдийн зургаан багийн нийт 100 гаруй тамирчин оролцов. Дээрх тэмцээнд “Залуу од” спорт клубийн дөрвөн багаас гадна Дархан-Уул аймаг, Багануур, Улаанбаатар, “Мон-Алтиус” биеийн тамирын дээд сургууль, Говь-Алтай, МУБИС, “Стар гольф” клуб зэрэг нийт 11 байгууллагын тамирчид цохилтын эмэгтэй, эрэгтэйчүүдийн ганцаарчилсан, баг, холимог хос, талбайн цохилтын ганцаарчилсан болон багийн гэсэн долоон төрөлд өрсөлдлөө.
2024-06-13
Эрэгтэйчүүд олон улсын тэмцээнд түрүүллээ
Өмнөд хөршийн Хандан хотод зохион байгуулсан, сагсан бөмбөгийн 3x3 төрлийн үндэснүүдийн лигийн цуврал“Stop-1” тэмцээнд манай улсын 23 хүртэлх насны эрэгтэйчүүд хэсгийн эхний тоглолтдоо Филиппиний багийг 21:12- оор хожсон. Дараа нь эзэн орны хүчирхэг багийг 20:19-өөр илүүрхсэн ч Японы багт 17:21-ээр ялагдсан юм. Тэд“Stop-2” тэмцээнд Турк менистаны багийг18:13-аар буулган авч, финалд Японы шигшээг 20:17-гоор хожин эхний цувралд хожигдсон хариугаа авснаар түрүүллээ. Манайхан “Stop-3”-т хэсгийн эхний тоглолтоо Филиппиний багтай өрнүүлнэ.
2024-06-13
Монголоос 10 бөх Парисын дэвжээнд зодоглох нь
Монголын жүдо бөхийн үндэсний шигшээ багийнхнаас 10 тамирчин Парисын олимпын наадмын дэвжээнд хүч сорих эрхээ авсан. Эмэгтэйчүүдээс дэлхийн аварга Б.Баасанхүү 48, ОУХМ Л.Сосорбарам52, Л.Энхрийлэн 57, О.Хүслэн -78, А.Адъяасүрэн +78 кг-ын жинд зодоглох нь. Эрэгтэйчүүдээс Э.Ариунболд60, Ё.Басхүү 66, Б.Эрдэнэбаяр 73, Б.Гончигсүрэн -100, О.Цэцэнцэнгэл+100 кг-д өрсөлдөнө. Монголын жүдо бөхийн холбооны удирдлага, гишүүд болон шигшээ багийн дасгалжуулагчид 66 кг-д Ё.Басхүүг сонгосон
2024-06-13
М.ГАНБАТ: Азийн физикийн олимпиад бол хүчтэнүүдийн өрсөлдөөн
Харин энэ удаад дундаж нь 44 оноо байв. Туршилтын хэсэгт угсралтад хоёр орчим цаг зарцуулснаа манай хүүхдүүд хэлсэн. Тэр нь нэлээд цаг авсан байж магадгүй. Олимпиадын үеэр онолын гурван бодлогыг таван цагийн хугацаанд бодно. Туршилтын хэсэгт 1-2 даалгаврыг таван цагийн хугацаанд гүйцэтгэдэг юм. Бодлогыг эрдэмтэд зохиодог. Зарим орон өөрсдөө зохиож чадахгүй, гадаадын улс орноос мэргэжилтэн ажиллуулсан тохиолдол бий. Бид бол даалгавруудыг өөрсдөө бэлтгэж байв.
2024-06-13
М.МӨНХ-ОРГИЛ: Багийнхантайгаа хамт бэлдсэн болохоор л амжилт гаргалаа
Азийн физикийн олимпиадыг энэ онд Малайз улсад зохион байгууллаа. Эл олимпиадаас Монгол Улсын сурагчид хос хүрэл медаль хүртэж, хоёр хүүхэд шагналт байрт шалгарав. Тухайлбал, нийслэлийн I сургуулийн сурагч М.Мөнх-Оргил, “Сант”-ын сурагч Г.Азжаргал нар хүрэл медаль хүртсэн. Түүнчлэн “Сант” сургуулийн сурагч С.Атархүү болон Дархан-Уул аймгийн “Од” сургуулийн сурагч Г.Амармэнд нар шагналт байр эзэллээ. “Тус олимпиадаас өмнө нь 1-2 хүүхэд л шагнал авдаг байсан. Харин энэ удаа дөрвөн хүүхэд шилдэгт багтсан нь томоохон амжилт” гэж Монголын физикийн олимпиадын хорооныхон онцолж байлаа. Азийн физикийн олимпиадад оролцсон багийнхныг төлөөлүүлэн нийслэлийн I сургуулийн 11Ё ангийн сурагч М.Мөнх-Оргилтой ярилцлаа.
2024-06-13
МУИС-д Солонгос судлалын уншлагын танхим нээв
МУИС-ийн номын санд өчигдөр Солонгос судлалын уншлагын танхим нээлээ. Тус танхимыг солонгос хэлээрх ном сурах бичгээр бүрэн хангасан гэнэ. Мөн сүүлийн үеийн тоног төхөөрөмжүүд суурилуулж, оюутнуудын суралцах боломжийг бүрдүүлжээ. Цаашид номуудыг нь цахимаар судлах боломжийг ч нээхээр ажиллаж буй гэнэ. Бусад сургуулийн оюутнууд МУИС-ийн номын сангийн журмын дагуу үйлчлүүлэх боломжтой. Тэрхүү журмын дагуу хувийн сургуулийн суралцагчид төлбөр төлж үйлчлүүлдэг. Харин төрийн өмчийн сургуулийн оюутнууд үнэ төлбөргүй үйлчлүүлдэг аж.
2024-06-13
Нийт нутгийн 50 орчим хувьд бэлчээрийн ургамал гарчээ
Манай орны нийт нутгийн 50 орчим хувьд бэлчээрийн ургамал гарчээ. Үүнд Булган, Орхон, Дархан-Уул, Говьсүмбэрийн нийт, Архангай, Хөвсгөл, Сэлэнгэ, Хэнтий, Төв, Дорнодын ихэнх нутаг хамрагдаж байна. Харин бусад нутгаар газрын гарц тааруу, эсвэл бэлчээрийн ургамал огт цухуйгаагүй аж. Тухайлбал, Өмнөговь, Дундговь, Дорноговийн ихэнх, Баян-Өлгий, Ховд, Говь-Алтай, Баянхонгор аймгийн цөөн сумын нутагт газрын гарц муу байгаа гэнэ. Энэ сарын эхээр агаарын температур нийт нутагт олон жилийн дунджийн орчим ба түүнээс 1.1-3.8 градусаар дулаан байжээ. Мөн нийт нутгийн 70 гаруй хувьд дунджаас бага хур тунадас орсон байна.
2024-06-13
ГССҮТ сайн дурын хөтчүүдтэй боллоо
Гэмтэл согог судлалын үндэсний төв (ГССҮТ) энэ жилээс сайн дурын хөтөч ажиллуулахаар болжээ. Үүний хүрээнд сайн дураар ажиллах хүмүүсийг бүртгэж дууссан аж. Уг ажилд оролцохоор сайн дурын 360 ажилтан бүртгүүлснийг дээрх төвийнхөн өчигдөр мэдээлэв. Амралт зугаалгын үе эхэлж, осол, гэмтэл ихэссэнтэй холбоотойгоор сайн дурын хөтөч ажиллуулахаар болсон гэнэ. Ингэснээр Амбулаторийн болон Яаралтай тусламжийн тасгаар үйлчлүүлэгчдийн хүлээгдэл, чирэгдлийг бууруулахыг зорьжээ. Сайн дурын хөтчүүд Амбулаторийн тасагт ажлын өдрөөр 08.00-12.00 цагт ажиллах нь. Харин Яаралтай тусламжийн тасагт 17.00-21.00 цагийн хооронд ажиллах юм байна.
2024-06-13
ЦЭЦ: Цагдаагийн албаны тухай хуулийн холбогдох заалт Үндсэн хууль зөрчсөн
Цэцийн дунд суудлын хуралдаан өчигдөр болж, Цагдаагийн албаны тухай хуулийн холбогдох заалт Үндсэн хууль зөрчсөн гэж дүгнэлээ. Дээрх хуулийн 26.1 дэх хэсэгт цагдаагийн алба хаагч нь гэмт хэрэг, зөрчил үйлдсэнд сэрдэгдэж байгаа хүний нэр, хаягийг тодруулах, шалгах, албадан саатуулах үндэслэл байгаа, эсэхийг тогтоох зорилгоор түр саатуулах хугацааг зургаан цаг хүртэл байхаар заасан байна. Гэтэл 26.2 дахь хэсэгт уг хугацааг түр саатуулах байранд хүргэснээс эхлэн тооцохоор зохицуулсан нь Үндсэн хууль зөрчсөн байна гэсэн дүгнэлтийг Үндсэн хуулийн цэцээс гаргалаа.
2024-06-13
58.2 мянган хүүхэд эрсдэлтэй орчин нөхцөлд хөдөлмөр эрхэлж байна
Хүүхдийн хөдөлмөрийн эсрэг дэлхийн өдөр өчигдөр тохиолоо. Эл өдрийг тохиолдуулан Хөдөлмөр, нийгмийн хамгааллын яамнаас “Хүүхдийн хөдөлмөр” сэдэвт зөвлөгөөнийг “Амлалтаа биелүүлье, хүүхдийн хөдөлмөрийг устгая” уриан дор зохион байгуулсан юм. Түүнчлэн энэ жил Хүүхдийн хөдөлмөрийн тэвчишгүй хэлбэрийн тухай Олон улсын хөдөлмөрийн байгууллагын 182 дугаар конвенцыг баталсны 25 жилийн ой тохиож буй.
2024-06-13
Төрийн албан хаагчийг сонгуулийн сурталчилгаанд оролцуулахгүй байхыг санууллаа
УИХ-ын ээлжит сонгуулийн сурталчилгаа эхэлсэнтэй холбоотойгоор төрийн бүх шатны албан хаагч болон эрх бүхий албан тушаалтнуудад хандсан мэдэгдлийг Төрийн албаны зөвлөлөөс гаргажээ. Юуны өмнө улс төрийнхөөс бусад албан хаагч аливаа нам, эвсэл, хөдөлгөөний үйл ажиллагаанд ямар нэг хэлбэрээр оролцохгүй байхыг сануулсан байна. Тухайлбал, албан хаагчид улс төрийн нөлөөлөлд автахгүй төвийг сахих, улс төрийн нам, эвсэл, нэр дэвшигчийн талаар эерэг, сөрөг мэдээлэл түгээхийг хориглодгийг мэдэгдэлд дурдав.
2024-06-13
НҮБ-ын Хөгжлийн бэрхшээлтэй иргэдийн эрхийг хамгаалах хорооны гишүүнээр Д.Гэрэл улирав
Нью-Йорк хотноо болж буй Хөгжлийн бэрхшээлтэй иргэдийн эрхийн тухай конвенцын оролцогч талуудын 17 дугаар бага хурлын үеэр НҮБ-ын Хөгжлийн бэрхшээлтэй иргэдийн эрхийг хамгаалах хорооны 2025-2028 оны гишүүний сонгууль болов. Тус сонгуульд Монголын хөгжлийн бэрхшээлтэй хүний эрхийн форумын үндэсний зохицуулагч бөгөөд НҮБ-ын Хөгжлийн бэрхшээлтэй иргэдийн эрхийг хамгаалах хорооны 2021-2024 оны гишүүн Д.Гэрэл дахин нэр дэвшиж, нууц санал хураалтаар олонхын санал авч, тус хороонд үргэлжлүүлэн ажиллах эрх авлаа.
2024-06-13
Хий дэлбэрсэн ослын улмаас 5.4 тэрбумын хохирол учирсан гэж дүгнэжээ
Баянзүрх дүүргийн 26 дугаар хорооны нутаг, “Дүнжингарав” худалдааны төвийн урд уулзварт шингэрүүлсэн хий тээвэрлэж явсан хүнд даацын автомашин БХЯ-ны Санхүү, хөрөнгө оруулалтын хэлтсийн эзэмшилд бүртгэлтэй жийптэй энэ оны нэгдүгээр сарын 23-24-нд шилжих шөнө шүргэлцсэнээс дэлбэрч, их хэмжээний гал гарч, аврагчид болон энгийн иргэд амиа алдан, олон айл орох оронгүй болсон. Энэ гал түймрийн хэрэгт ЦЕГ-ын Мөрдөн байцаах алба, Тээврийн цагдаагийн албаны хамтарсан ажлын хэсэг мөрдөн шалгах ажиллагаа явуулж, НПГ-аас хяналт тавьж буй билээ.
2024-06-13
