Экспортод гаргасан ашигт малтмалын бүтээгдэхүүний аравдугаар сарын олон улсын зах зээлийн мэдээллээс харахад зэсийн үнэ он гарснаас хойших хамгийн өндөр түвшинд хүрчээ. Тухайлбал, Лондоны металлын биржид зэсийн үнэ тонн тутам нь 9952 ам.долларт хүрсэн нь өнгөрсөн есдүгээр сартай харьцуулахад 307 ам.доллароор өссөн үзүүлэлт гэнэ. Өнгөрсөн жилтэй харьцуулахад энэ онд зэсийн илүүдэл нэг дахин нэмэгдэх төлөв гарсан, мөн АНУ-ын баримталж буй тарифын нөлөө зэрэг нь энэхүү зах зээлд цохилт өгөхгүй, үнэ өссөөр буй нь зэсийн ирээдүйг өөдрөгөөр төсөөлөхөөс өөр сонголтгүй болгож байна гэж шинжээчид дүгнэжээ.
2025 онд Монгол Улс эдийн засгийн өсөлтөө хадгалах, валютын орлогоо нэмэгдүүлэхийн тулд нүүрс, зэс, алт зэрэг голлох түүхий эдийн экспортоо өсгөх зорилт тавьсан. Гэвч нүүрсний орлого эрс буурсан бөгөөд үүнийг нөхөх хүлээлттэй байгаа зэс, алтны ханш гуравдугаар улиралд ийнхүү өсөлттэй гарлаа. Эргэн сануулахад, зэсийн үнэ өнгөрсөн дөрөвдүгээр сараас эхлэн огцом унаж, нэг тонн нь 9176 ам.доллар болсон удаатай.
Г.Сансар
