Жил бүрийн хаврын хуурайшилтын үед ой, хээрийн гал түймрийн нөхцөл байдал хүндэрч улс эх орон, нийгэм эдийн засагт ихээхэн хэмжээний хохирол учруулсаар байна. Гал түймрийн нөхцөл байдлын талаар Экологийн цагдаагийн албаны урьдчилан сэргийлэх хамтын ажиллагааны хэлтсийн мэргэжилтэн, цагдаагийн дэд ахлагч Г.Анар-Эрдэнэ мэдээлэл өглөө.
"Он гарснаас хойш Улаанбаатар хотын ногоон бүсэд гал түймрийн 200 гаруй дуудлага мэдээлэл Нийслэлийн Онцгой байдлын газарт иржээ. Үүний 56 нь шар өвс шатаасны улмаас үүссэн их бага хэмжээний ой, хээрийн түймэр байна.
Аймаг, орон нутгийн хэмжээнд 9 аймгийн 21 суманд 23 удаагийн ой, хээрийн түймэр гарсан бөгөөд дээрх түймрийн улмаас 54.018 га талбай, 3 айлын өвөлжөө шатаж, 1 хүн нас барсан. Энэ нь өнгөрсөн оны мөн үетэй харьцуулахад ой, хээрийн гал түймрийн хохирлын хэмжээ 41.5 хувиар өссөн үзүүлэлттэй байна.
Тухайлбал, нийслэлийн хэмжээнд Хан-Уул дүүргийн нутаг дэвсгэрт хамаарах Арцатын аманд 7 га, Архангай аймгийн Эрдэнэмандал сумын “Онгоны ам”, Баянхонгор аймгийн Галуут, Эрдэнэцогт сумын ямаат багийн “Хашаат” гэх газарт 8 га талбай шатсан. Дээрх газруудад тухайн орон нутгийн экологийн асуудал хариуцсан албан хаагч, онцгой байдлын алба, орон нутгийн иргэд өөрийн санаачилгаар гал унтраах ажилд оролцож байна" гэлээ.
Монгол Улсын Эрүүгийн хуулийн 24.7 дугаар зүйл “Ой хээрийн түймэр тавих” гэмт хэргийг хуульчилж өгсөн байдаг. Дээрх хуульд гэм буруугийн хэлбэр, хохирлын хэмжээг харгалзан 1-12 жилээр хорих ял шийтгэхийн зэрэгцээ байгаль экологид учирсан хохирлыг нөхөн төлүүлэхээр хуульчилсан.
Иймд хуурайшилтын үе буюу 06 дугаар сарын 10-ны өдөр хүртэл ногоон бүсэд зорчихдоо ил задгай гал түлэхгүй байх, асаасан гал, чүдэнз, тамхины галыг бүрэн унтраах, халуун үнс нурмыг ил задгай асгахгүй байж ой, хээрийн түймрээс урьдчилан сэргийлэхийг Экологийн цагдаагийн албанаас нийт ард иргэддээ анхааруулж байна.
