“Эрдэнэт үйлдвэр”-ийн 49 хувийг ОХУ-ын талаас худалдан авсныг төрийн өмчид бүртгэхээр болсныг түүнийг худалдан авсан “Монгол зэс”-ийнхэн эсэргүүцэн Захиргааны хэргийн анхан шатны шүүхэд хандсан. Шүүх өнгөрсөн баасан гаригт урьдчилсан хэлэлцүүлийг нь хийж Засгийн газрын тогтоолыг түдгэлзүүлэхээр болсон аж. Үүнийг “Монгол зэс”-ийнхэн “Эрдэнэт үйлдвэр”-ийн хувьцааг авахад төрийн мөнгө ашиглаагүй гэдэг нь шүүх хурлын явцад нотлогдож эхэлжээ” гэсэн гарчигтай өчигдрийн зарим хэвлэлд мэдээлсэн байв.
Энэ талаар шүүхийн эх сурвалжаас лавлахад “Шүүх хурлын урьдчилсан хэлэлцүүлэг өнгөрсөн баасан гаригт болж, энэ сарын 22-нд хэлэлцэхээр товлосон. Энэ үеэр нэхэмжлэгч “Монгол зэс”-ийн гаргасан хүсэлтийн заримыг нь хангаж, нэг хэсгийг нь хэрэгсэхгүй болгож шийдвэрлэсэн. Хэвлэлд нэхэмжлэгч тал хэтрүүлэгтэй мэдээлэл нийтлүүлсэн ч зарим нь үнэний хувьтай” гэж мэдээлэв.
