Мал сүргийг өвчнөөс урьдчилан сэргийлэх тарилга, туулга, угаалгын ажил тогтсон хуваарийн дагуу 5 дугаар сарын 1-нээс улс орон даяар хийж эхэллээ. Мөн мал үржүүлэг, технологийн ажлын нэгдсэн график төлөвлөгөө бүх оронутагт хэрэгжиж эхэллээ.
Мал эмнэлгийн урьдчилан сэргийлэх болон мал үржүүлэг технологийн ажил үйлчилгээний жилийн ажлын нээлтэд оролцож, вакцин, био бэлдмэлийн дээж гардуулж байна ХХААХҮ-ийн сайд Б.Батзориг Архангай аймагт ажиллаж, "Мал эмнэлгийн урьдчилан сэргийлэх болон мал үржүүлэг, технологийн ажил, үйлчилгээ"-ний нээлтийн арга хэмжээнд оролцох үеэрээ “Малын тоо 66, 2 саяд толгойд хүрсэн, энэ жил 22 сая толгой төл хүлээн авах төлөвтэй байгаа. Гэтэл бид өнөөдөр энэ өсөн нэмэгдэж байгаа мал, сүргийнхээ үр, шимийг хангалттай хэмжээнд хүртэж чадаж байна уу гэдэгт бид анхаарлаа хандуулах ёстой. Малчдын амжиргааны эх үүсвэр болсон мал сүргээ ямар нэгэн өвчний эрсдэлгүй өсгөн үржүүлж ашиг шимийг хүртэн ая тухтай амьдрах боломжийг нэмэгдүүлэхэд Засгийн газар, аймаг орон нутгийн төр захиргааны болон мэргэжлийн байгууллагууд бүх нийтээрээ идэвх санаачилгатай, хариуцлагатай ажиллаж, энэ ажлын хэрэгжилтэд хяналт тавьж, үр дүнг тайлагнадаг болох зорилгоор бид энэхүү бүх нийтийн аянг зохион байгуулж байна. Мэргэжлийн байгууллага, аж ахуйн нэгж, малчдын зохион байгуулж байгаа мал сүргийг гоц халдварт, халдварт болон гадна шимэгчлэх өвчнөөс урьдчилан сэргийлэх арга хэмжээг тогтоосон цаг хугацаанд чанартай зохион байгуулахад дэмжлэг үзүүлж ажиллахыг Монгол Улсын иргэн бүрээс хүсч уриалж байна” гэлээ.
