Манай улс өчигдрийн байдлаар 214.5 мянган га-гаас 268.1 мянган тонн үр тариа, үүнээс 202.7 мянган га-гаас 252.8 мянган тонн улаан буудай, 18.7 мянган га-гаас 200.5 мянган тонн төмс, 10.1 мянган га-гаас 110.2 мянган тонн хүнсний ногоо, 26.5 мянган га-гаас 62.1 мянган тонн тэжээлийн ургамал, 50.9 мянган га-гаас 21.7 мянган тонн тосны ургамал хураан авсныг ХХААХҮЯ-наас мэдээлэв. Энэ нь үр тарианы хураалт 60.7, үүнээс улаан буудайнх 61.6, төмснийх 94.3, хүнсний ногооных 91, тэжээлийнх 38.9, тосны ургамлынх 44 хувьд хүрсэн гэсэн үг аж.
Ташрамд дурдахад, маргааш Хөвсгөлийн уулархаг нутаг, нөгөөдөр баруун болон төвийн аймгуудын нутгийн хойд хэсэг, бямба гарагт төв, зүүн аймгуудын нутгийн зарим газраар цас орох гэнэ. Салхи ихэнх хугацаанд секундэд 5-10, маргааш, нөгөөдөр нутгийн хойд хэсгээр, бямба гарагт нутгийн зарим газраар 12-14 метрт хүрч ширүүсэх аж. Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор шөнөдөө 11-16 градус хүйтэн, өдөртөө 2-7 градус дулаан байх нь. Хэнтийн уулархаг нутаг, Эг, Үүр, Идэр, Тэс, Туул, Тэрэлж голын хөндийгөөр шөнөдөө 7-12 градус хүйтэн, өдөртөө 5-10 градус дулаан байх гэнэ. Бямба гарагт нутгийн хойд хэсгээр бага зэрэг хүйтрэх төлөвтэй.
Бэлтгэсэн Ц.Ундрал
