“Чингис хаан” олон улсын үзэсгэлэнд 698 үзмэр дэлгэх нь

Чех улсын Прага хотод “Чингис хаан” үзэсгэлэн зохион бай­гуулах талаар Соёл, спорт, аялал жуулчлал, залуучуудын яамнаас өмнө нь мэдээлж байсан. Тэгвэл уг үзэсгэлэнг ирэх сарын 10-наас зургаадугаар сарын 22 хүртэл зохион байгуулахаар товыг нь гар­гажээ. Монгол болон Бүгд Найрамдах Чех Улсын хооронд дип­ломат харилцаа тогтоосны 75 жилийн ойн хүрээнд Чехийн Үндэс­ний музейн “Historical building”-д танхимд дэлгэх уг үзэсгэлэнгийн бэлтгэл ажил хангагдаад буй аж. Үүнд “Чингис хаан” үн­дэсний музей болон ШУА-ийн Түүх, археологийн хүрээлэнгийн нийт 170 дэсийн 698 үзмэр, эд өлгийн зүйлийг дэлгэхээр болсон байна.

“Чингис хаан” үндэсний музейнхэн үзмэрүүдийн тээвэр­лэлтийн талаар “Олон улсын хилээр чөлөөтэй нэвтрэх тусгай эрх бүхий, ариутгал хийсэн зориулалтын сав, хүчил шүлтгүй баг­лаа боодлыг тухайн үзмэрийн хэмжээнд тааруулан БНСУ-д захиалгаар хийлгэсэн. Үзмэрүүдээ музейд эргэн ирэх хүртэл ха­риуцах олон улсын даатгалд хамруулан, гааль, цагдаа, тагнуулын бай­гууллагынхны хяналтад, Соёлын биет өвийг зөөж тээвэрлэх журмын дагуу тээвэрлээд байна” хэмээн мэдээлэв.

Ч.Зул