Гэр орноосоо хөндийрч, урт хугацааны турш хараа хяналтгүй амьдарч байгаа хүүхдийг эцэг эх, асран хамгаалагч, харгалзан дэмжигчид нь хүлээлгэн өгөх, боломжгүй тохиолдолд улсын асрамж, халамжийн үйлчилгээнд хамруулах ажлыг нийслэл, дүүргийн хэмжээнд энэ оны 11 дүгээр сараас эхлэн хэрэгжүүлж эхэллээ.
Хүүхэд хамгаалал, хариу үйлчилгээний түр байрыг Хүүхэд залуучуудын сургалт хүмүүжлийн тусгай цогцолборт гарган нэгдсэн арга хэмжээг 10 хоног зохион байгуулж ажиллаж байна. Илрүүлэлт арга хэмжээнд 11 сарын 21-ны 12 цагийн байдлаар нийт 49 хүүхэд хүлээн авч хариу арга хэмжээ авч, үйлчилгээ үзүүлсэн байна. Хүүхдүүдийг хүлээн авч бүртгэх, үнэлгээ хийх, усанд оруулах, хооллож, дулаан хувцаслаж эрүүл мэндийн үзлэг шинжилгээ болон сэтгэлзүйн үйлчилгээг үзүүлж гэр бүлд нь эргүүлэн нэгтгэх зэрэг ажлыг авч хэрэгжүүлж байгаа аж.
Хүйтний улиралд хүүхдийг эрсдэлд өртөхөөс сэргийлж гудамжны нөхцөлд амьдарч байгаа болон эцэг эхийн хараа хяналт сул хүүхдийг илрүүлэх, илэрсэн хүүхдэд хамгаалах, хариу үйлчилгээ үзүүлэх, хүүхдийг гэр бүлд нь эргэн нэгтгэх, цаашид хяналтанд авч ажиллах, хараа хяналтгүй хүүхдийг дүүргийн хэмжээнд тогтоон бүртгэлжүүлж, ажлыг зохион байгуулж НЗДТГ-ын Нийгмийн бодлогын хэлтэс, Нийслэлийн Засаг даргын дэргэдэх Хүүхэд-залуучуудын сургалт хүмүүжлийн тусгай цогцолбор зэрэг Нийслэлийн төр захиргааны байгууллагууд ажиллажээ.
