Төрийн албаны зөвлөлөөс төрийн албаны шалгалтад бэлтгээ буй иргэд, залууст зориулан “e-taz” гар утасны аппликэйшнийг бүтээжээ. 2020-2021 онд уг аппликэйшний хөгжүүлэлтийг хийж, эхний хувилбар нь андройд гар утасны системд эхлэн гарлаа. Шалгалтад бэлтгэгч хэн бүхэн өөрийн мэдээллээ бүртгүүлэн орж, холбогдох хууль, журамтай танилцах, төрийн албаны шалгалтын жишиг тест бөглөх, загвар үүсгэн өөрийгөө сорих, видео шторк, заавар, шалгалттай холбоотой Төрийн албаны зөвлөлөөс бэлтгэн гаргасан албан ёсны ном, гарын авлагатай танилцах, татан авах боломжтой. Гол онцлог нь үнэ төлбөргүйгээр татан авч ашиглах юм. Төрийн албаны төв байгууллагаас албан ёсны гар утасны аппликэйшн гаргаснаар бусад аппликэйшний агуулга, сорил, даалгавраас бэлтгэх шаардлагагүй болж, шалгалтад бэлтгэгчдээс ирдэг “энэ аппликэйшнээс бэлтгэвэл хэр бол”, “аль нь сайн бэ” гэсэн асуулт, эргэлзээ байхгүй болох юм.
