Монгол, Японы мэргэжилтнүүд гэр бүл, хүүхдийн хэргийн дагнасан шүүхийн талаар санал солилцлоо

Хууль зүйн үндэсний хүрээлэн болон Японы Хууль зүйн яамны харьяа Сургалт, судалгааны хүрээлэнгийнхэн хамт­ран “Гэр бүл, хүүхдийн хэргийн даг­насан шүүх: Монгол Улс ба Япон Улс” сэ­дэвт семинарыг өчиг­дөр зохион байгуул­лаа. Салбарын мэргэжилтнүүд энэ үеэр хоёр орны гэр бүлийн шүүхийн бүтэц, үйл ажил­лагааны онцлог болон хэрэг хянан шийдвэрлэх эрх зүйн зохицуулалтын талаар харилцан санал солилцсон юм.

Монгол Улсад Гэр бүлийн хэрэг хянан шийдвэрлэх тухай хуулийг 2024 оны зургаадугаар сарын 4-нд баталж, нийслэлд гэр бүл, хүүхдийн хэргийн анхан болон давж заалдах шатны тойргийн шүүх байгуулахаар төлөвлөсөн байдаг. Өдгөө Гэр бүлийн тухай хуулийн шинэчилсэн найруулгын төслийг бо­ловсруулж, УИХ-д өргөн мэдүүлэхээр зэ­хэж буй гэнэ. Ингэснээр гэрлэлт цуцлах болон эцэг, эхийн эрхийг хязгаарлах шийдвэр гаргахдаа бага насны хүүхдийг хохироох­гүй байх зарчмыг хэрэгжүүлэх эрх зүйн үндэс бүрдэх аж. Тиймээс Японы гэр бү­лийн шүүхийн тогтолцоо, шийдвэрийн биелэлтийг хангах туршлага зэрэг гадаад улсын сайн жишээг судлах нь манай оронд шинээр байгуулж буй дагнасан шүүхийн системийг хурдан төлөвшүүлэх, үр дүнтэй ажил­луулахад онцгой ач холбогдолтойг орол­цогчид онцоллоо.

ол­цогчид онцоллоо. Японы Хууль зүйн яамны харьяа Сургалт, судалгааны хүрээлэнгийн профес­сор Рю Хигүчи тус улсын гэр бүлийн шүү­хийн бүтэц болон онцлогийг эл хэлэл­цүүл­гийн үеэр танилцуулсан юм. Мөн дээрх хү­рээлэнгийн захирал Хироюки Ито даг­насан шүүх байгуулж буй хамгийн гол зорилго нь гэр бүлийн амар тайван байдал, хүүхдийн элэг бүтэн амьдралыг хангахад орших учиртайг онцлов.

Ташрамд дурдахад, Хууль зүйн үндэсний хүрээлэн дээрх байгууллагатай 2021 онд хамтран ажиллах санамж бичиг байгуулснаас хойш эрүүгийн хэрэг хянан шийдвэрлэх тогтолцоо, про­курорын чиг үүрэг зэрэг сэдвээр таван удаа семинар, хоёр удаа хамтарсан сургалт зохион байгуулаад байна. Энэ удаагийн хэлэл­цүүлгээр хөндсөн гэр бүл, хүүхдийн хэргийн дагнасан шүүхийн зохицуулалт, шүү­хийн албадлагын хэрэгжилтийн асуудал нь өнөөгийн хууль зүйн бодлого, шүүхийн прак­тикт нэн шаард­лага­тай, цаг үеэ олсон алхам болсныг салбарын төлөөллүүд тодотгов.

Э.Сондор