Эрдэм шинжилгээний хурлын үеэр судлаачид соёмбо үсгийн үүсэл, хөгжил, уламжлал, бэлгэдэл болон судалгааны өнөөгийн чиг хандлагын талаар 10 гаруй илтгэл хэлэлцүүлжээ. Тухайлбал, “Өндөр гэгээний үсгийн урлал: Соёмбо үсэг” үндсэн илтгэлээс гадна “Монголын утга соёлд Анхдугаар Богдын дүрийг бүтээсэн туршлага”, “Соёмбо тэмдгийн бэлгэдлийг тэжээхүй ухааны онолоор тайлбарлах нь”, “Соёмбо үсгээр бичсэн Өндөр гэгээн Занабазар хутагтын буман зарлиг”, “Хүрээ Майдар бурхны амин мод ба бичээсний тухай” зэрэг сэдэвт судалгааны үр дүнгээ танилцуулсан юм. Түүнчлэн Өндөр гэгээний намтар, үйл хэрэг, соёмбо үсгийн зөв бичих зүй, төвөд болон жагар хэлээр бичсэн зохиол, сударт уг үсэгтэй холбоотой баримт, тайлбарыг хэрхэн тусгасныг хөндлөө.
Мөн энэ үеэр 17 уран бүтээлчийн “Номт улс оршихуй” хамтарсан үзэсгэлэнг дэлгэсэн бөгөөд ирэх арванхоёрдугаар сарын 29-нийг хүртэл олны хүртээл болгох аж. Үүний хүрээнд Өндөр гэгээн Занабазарын дүр бүхий танка зураг, судар зэрэг өмнө нь нийтэд дэлгэж байгаагүй 100 гаруй ховор нандин үзмэрийг толилуулсан байна.
У.Цэцэг
