Өчигдрөөс илүү маргаашийг
бүтээхийн төлөө

Засгийн газар: Ойн хөнөөлт шавжийг устгахад 2 тэрбум төгрөг зарцуулахаар болжээ 


Засгийн газар Өмнөговь аймгийн Даланзадгад сумд байрлах ойн дундын ангийг хоёр хуваах шийдвэр гаргалаа. Мөн нөөц хөрөнгөнөөс 2 тэрбум орчим төгрөгийг ойн хөнөөлт шавжтай тэмцэх ажилд зарцуулахаар боллоо. Өнөөдрийн тооцооллоор 737 мянган га талбайд хөнөөлт шавж тархсан гэсэн судалгаа гарсан байна. Ялангуяа Хөвсгөл аймагт хамгийн их тархацтай байгаа аж. Тухайлбал, 327,489 га газарт хөнөөлт шавжийн голомт үүсчээ.

Ойн хөнөөлт шавжийн тархалтыг тогтоох, тэмцлийн ажил явуулах талбайг сонгох, хугацааг тодорхойлох зорилготой судалгаагаар шилмүүст ойн сан бүхий 16 аймгийн 109 сум, Богд хан уулын ДЦГ, Горхи-Тэрэлжийн ТХГ, Улаанбаатар хотын бүсийн ойн санд навч шилмүүсний хөнөөлт шавж болох Якобсоны төөлүүрч эрвээхэй, Шинэсний шилмүүс хуйлагч эрвээхэй гэсэн хоёр зүйлийн шавж 732.7 мян.га талбайд голомт үүсгэсэн болохыг тодорхойлжээ.

Дээрх хоёр зүйлийн хөнөөлт шавж нь хөгжлийн хүрэнцрийн үе шатандаа шинэс модны шилмүүсээр хооллон хөнөөл учруулдаг бөгөөд хүрэнцрийн тоо толгойн нягтшилыг бууруулах тэмцлийн ажлыг агаарын хөлөг болон үүргийн шүршигч багаж ашиглан микробиологи, химийн аргаар ирэх долдугаар сарын 10-ныг хүртэл явуулах юм байна. Мөн өнөөдрийн хуралдаанаар “Тэрбум мод” үндэсний хөдөлгөөн, Шинэ сэргэлтийн бодлогыг хэрэгжүүлэх хүрээнд Өмнөговь аймгийн Сэврэй, Цогт-Овоо сумдад сум дундын ойн ангийг шинээр байгуулахаар шийдвэрлэлээ.