Мэрилин Монрогийн дүр бүхий хүүхэлдэйг 81 ам.доллароор борлуулж байна 

Холливудын домогт жүжигчин Норма Жин Мор­тенсон буюу Мэрилин Монрогийн мэн­дэлс­­­ний 100 жилийн ойд зориу­лан “Mattel” ком­пани түүний дүр бүхий “Barbie signature” цуг­луулгыг худалдаанд гаргалаа. Энэ нь тус ком­панийн Монрогийн төрхөөр бүтээж буй анхны хүүхэлдэй биш бөгөөд тэд 1997 оноос хойш түүний алдартай кино­ны дүрүүдээс сэдэв­лэсэн хэд хэдэн цуг­луул­­га олон нийтэд хүргээд байв. Харин энэ удаагийн хувилбар нь Монрогийн олон нийтэд хамгийн их та­нигд­сан ягаан даа­шинз­тай төрхийг дахин бүтээснээрээ онцлогтой. 

Шинэ барбиг Монрогийн 1953 онд тог­лосон “Gentlemen prefer blondes” киноны “Diamonds are a girl’s best friend” дууны үзүүл­бэрээс санаа авч урлажээ. Энэхүү хүүхэлдэй нь бие барьсан заг­вартай, ардаа том тууз бүхий тод ягаан даашинз, урт бээлий, өн­дөр өсгийт, гялалзсан гоёл чимэглэлтэй аж. Америкийн зах зээлд 81 ам.доллароор борлуулж буй эл хүүхэлдэйн багцад жинхэнэ эх бүтээл мөн, эсэнийг батал­гаа­жуулахгэрчилгээ дагал­дах юм байна.

“Mattel” уг хүүхэлдэйг Монрогийн өвийг ха­риуцдаг “Estate of Marilyn Monroe” байгуул­лагатайхамтран бүтээжээ. Тэд энэхүү бүтээ­лээрээ зөвхөн жүжигчний гоо сайхан, алдартай хувцаслалтыг сануулаад зогсохгүй тухайн үеийнхээ нийгмийн хэм хэмжээг даван гарсан уран бүтээлч, продюсер, бизнес эрхлэгчийнх нь хувиар хүндэтгэл үзүүлж байгаагаа онцолжээ.

Ташрамд дурдахад, Мэрилин Монрогийн 100 жилийн ойн хүрээнд Лос-Анжелес хотын “Academy museum of motion pictures” музейд түүний амьдрал, уран бүтээлд зориулсан “Marilyn Monroe: Hollywood icon” үзэсгэлэн дэлгэсэн бөгөөд 2027 оны хоёрдугаар сар хүртэл үргэлжилнэ. Энэхүү үзэсгэлэнд түүний кинонд өмсөж байсан хувцас болон эдэлж хэрэглэсэн ховор зүйлсийг дэлгэн үзүүлж буй юм.

У.Сүрэн