“Хүнд үед нь ч бид Украины хажууд байх болно” 

Украины хүнгүй нисдэг төхөөрөмжүүд өнгөрсөн ням гаргийн шөнөөс Москва хот руу довтолж, үүнд 600 гаруй дрон оролц­соны 180-ыг нь устгасан хэмээн Оросын Бат­лан хамгаалах яам мэдээллээ. Өөр нэг эх сур­валж 800 дрон хөөргөсний 600-г нь Москва руу чиглүүлжээ гэсэн байх юм. Москва хотын захирагч Сергей Собянин, Москва му­жийн амбан захирагч Андрей Воробьев нарын хэлснээс үзвэл уг довтолгоонд өртөж, “Wildberies” гэдэг агуулах шатсан байна. Аж үйлд­вэ­рийн эл цогцолбор ийм довтолгоонд хоёр дахь удаагаа өртсөн нь энэ аж. Украины Батлан хамгаалах яамны нотолсноор энэ цогцолборын томоохон 10 төвийн долоо нь жагсаалтаас гарчээ. Цахилгаан дамжуулах шугамгэмтсэнээс Подольскийн тойрогт хувийн 110 байшин гэрэлгүй болжээ. До­модедовод эм, эмнэлгийн хэрэгслийн агуулах бас шатсан байна. Москвад мөн хэд хэдэн хүн, түүний дотор хүүхэд амь үрэгджээ. Москва­гийн нисэх онгоцны дөрвөн ч буудал үйл ажил­лагаагаа хязгаарлав. Энэ довтолгоог сүүлийн хоёр жилд болсон хамгийн то­моохон үйлдэл гэж үзэж буй юм байна. 

Орос ч энэ шөнө Украины Киев хот болон Днепропетровск, Полтав муж руу дрон, пуу­жингаар хариу довтолгоон хийжээ. Дэлгүүр, зах, худалдааны төвүүд өртсөн байна. За­рим үйлдвэрийн ажиллагаа зогсжээ. Тэдний дотор уул уурхайн үйлдвэрийн иргэний зориу­лалттай объект ч орсон аж. Оросын Бат­лан хамгаалах яамны мэдээлэлд дурд­санаар цэрэг, дайны зориулалттай “Фла­минго” гэх далавчит пуужингийн хатуу түл­шээр ажил­ладаг хурдасгагчийн үйлдвэр, цохил­тын нисгэгчгүй төхөөрөмжийн эд ангийн “Киев111” үйлдвэр цохилтод өртжээ. Мөн зэвсэг, байлдааны техникийн ган бүтцийн металлур­гийн комбинатын цехүүд ажил­лагаагүй болжээ. Полтав мужид нефть дахин боловсруул­даг заводод ч хохирол учирсан байна. Мэ­дээллүүдээс үзвэл, Украин энэ довтолгоондоо Британид үйлдвэрлэсэн төхөө­рөмж түл­хүү ашигласан бололтой. Оросын тал Британийг буруутгаж шүүмжилжээ. Лондон дахь Оросын ЭСЯ-ны мэдэгдэлд “Ийм маягаар нэгд­сэн хаант улс цуст гэмт хэрэг, алан хя­дах ажиллагааг өөгшүүлж, түүнд оролцсон байна. Үүнийхээ төлөө Лондон хариуцлага хүлээх болно” хэмээн мэдэгдэлдээ өгүүлжээ. Британийн Батлан хамгаалах яам “Украинтай мөр зэрэгцэн зогсох болно. Путиний хууль бус довтолгооноос хамгаалахад нь шаардлагатай зэвс­гээр туслах шийдвэр төгс байна” гэсэн хариу барьсан гэнэ. Британийн энэ байр суурь өөрч­лөгдөшгүй болохыг Ерөнхий сайд Энди Бёрнем нь нотолжээ. Тэрбээр “Хүнд хэцүү үед нь бид Украины хажууд нь байх болно” гэж хэлжээ. Британийн хоёр ч компанид үйлд­вэрлэсэн нисгэгчгүй төхөөрөмжийг украинчууд Оросын газар нутагт цэргийн болон нефть боловсруулах үйлдвэр заводуудад нь цохилт өгөхдөө ашигласаар иржээ.

Р.Жаргалант