“Барса”, “Реал”-ын түүхэн тоглолт

Испанийн Супер цомын тэмцээний финалд “Барселона” өрсөлдөгч “Реал”-ыг 5:2-ын харьцаатай яллаа. Испанийн төдийгүй дэлхийн супер хоёр багийн тулааныг чимсэн баримт, статистикийг сөхвөл тун сонирхолтой дүр зураг гарна. 

• “Барса” хоёр класико дараалж “Реал”-ын хаалганд есөн гоол оруулав: Тэд үүнээс өмнөх зургаан тоглолтдоо “Реал”-ын эсрэг до­лоон гоол оруулаад байсан юм. Түүнчлэн “Бар­са” хоёр класико дараалж дөрөв болон түүнээс олон гоол орууллаа. Харин “Реал” 1963 онд Ка­та­лоны багийг ийм олон гоолын зөрүүтэй (5:1, 4:0) бут ниргэж байжээ.  
• Нэг үед гурваас олон гоол оруулав: 2009 оны тавдугаар сард “Бернабеу”-д болсон алдарт тог­лолтоос хойш “Барса” анх удаа эхний хагаст гур­ваас олон гоол оруулав. 15 жилийн өмнөх тэр­хүү тулаанд зочин баг 6:2-ын харьцаатай ялсан билээ. Харин 1943 онд болсон тоглолтын эх­ний хагаст тэд “Реал”-ын хаалганд дөрвөн гоол хийж байжээ. Тухайн үед “Барса” 4:2-оор тэр­гүүлж байгаад 5:5-ын харьцаатай эвийн гэрээ бай­гуулсан түүхтэй. 
• Финалд гурав дахь удаагаа таван гоол алдав: “Реал” 1962 оны Аваргуудын цомын тэмцээний финалд “Бенфика” багт, 2007 оны Испанийн Супер цомд “Севилья”-д 3:5 харь­цаатай тус тус ялагдал хүлээж байлаа.   
• Анх удаагаа 5:2: Эл хоёр баг хоорондоо 259 удаа таарч тоглохдоо анх удаа 5:2-ын харь­цаатай тоглолтыг өндөрлүүлэв. 
• Улаан хуудаснууд: Сүүлийн дөрвөн кла­сикогийн гуравт нь “Барса”-гийн тоглогч улаан хуудас авав. Гэхдээ энэ шийтгэл ялалтад нь сөргөөр нөлөөлсөнгүй. 

Багаас гадна тоглогч, дасгалжуулагчдын карьерын онцгой, түүхэн мөчөөр уг тоглолт арвин болжээ. 

• Анхны болон найм дахь цом: Ханс-Дитер Флик “Барселона”-гийн дасгалжуулагч бо­­лоод анхны, дасгалжуулагчийн замналын найм дахь цомоо хүртэв. 
• Хожлоос олон хожигдол: К.Анчелотти “Барса”-д 11 удаа хожигдож, 10 хожоод байна. Со­нир­холтой нь, тэрбээр эль класикод нэг ч тэн­цэл­гүйгээр есөн удаа ялж, есөн удаа ялагджээ. 
• Гурав дахь цом: Энэ жил дөнгөж 17 нас­тай Л.Ямаль мэргэжлийн хөлбөмбөгчийн гу­рав дахь цомоо хүртлээ. Тэрбээр Европын аварга, Ис­панийн аварга, Испанийн Супер цо­мын авар­га болоод байна. 
• 18 дараалсан пенальти: Польш довтлогч Р.Левандовски класикогийн 18 дараалсан тор­гуу­лийн цохилтыг амжилттай гүйцэтгэлээ. Хоёр баг класикод торгуулийн цохилтоо 2008 оны арванхоёрдугаар сараас хойш алдаагүй явж бай­­на. Тухайн үед И.Касильясыг С.Это`О ар­галж чадаагүй ч баг нь 2:0-ийн харьцаатай ялж байв. 
• Килианы гурав дахь гоол: Франц довт­логч К.Мбаппе “Реал”-тай хамт гурван финалд тог­лохдоо гурван гоол оруулаад байна. Тэр­бээр “Ата­ланта” (UEFA Супер цом, хожил), “Пачука” (тив хоорондын цом, хожил), “Бар­селона” (Ис­па­нийн Супер цом, хожигдол) багийн эсрэг гоолд­жээ.
• Рафиньягийн 19 дэх гоол: Түүний хувьд улирлын эхний хагаст хамгийн олон гоол оруул­сан нь энэ болж байна. Улирал дуусахад дөрвөн сар дутуу байгаа учраас түүний гоолын тоо өсөх нь гарцаагүй. 
• Ф.Канутег гүйцлээ: Р.Левандовски (та­ван гоол) Испанийн Супер цомд оруулсан гоо­лын тоогоор Ф.Канутег гүйцэж түрүүллээ. Эл жаг­саалтыг 14 гоолтой Л.Месси тэргүүлдэг юм.

Э.Манлайбаатар