Төв талбайн цаг эвдэрч, сэлбэг хэрэгсэл нь олдохгүй байна 

Сүхбаатарын талбайн баруун тал, Төв шуудангийн дээр байрладаг цаг ажиллахгүй долоо хонох гэж байна. Нийс­лэлийн иргэд хотын төвийнхөө тэрхүү цагийг харж, завгүй амьдралын хэмнэлээ тохируулдаг гэхэд хилс­дэхгүй. Гэтэл өнгөрсөн лхагва гаргаас эхлэн зүү нь эргэхгүй, 16.15 цагийг заагаад зогсжээ. Энэ талаар нийс­лэлийн ЗДТГ-аас лавлахад “Нийслэлд хамаагүй, “Мон­гол шуудан” ХК мэднэ” гэв. Харин тус компанийн гүй­цэтгэх захирал Г.Тэлмэн “Төв шуудангийн барилгад дөрвөн байгууллага үйл ажиллагаа явуулдаг. Энэ асуудлыг “Мэдээлэл холбооны сүлжээ” ХХК-ийнхан ха­риуцах байх” хэмээсэн. Эл компанийн гүйцэтгэх за­хи­рал С.Адъяасүрэнгээс лавлахад “Төв шуудангийн цаг эвдэрсэн гэх дуудлагыг бид өнгөрсөн лхагва гаргийн өглөө Мэ­дээлэл, шуурхай удирдлагын төвд өгсөн. Одоо­гоор ца­гийг засаж, ажиллуулаагүй байна. Нэг чип нь эвдэрсэн, Герман улс руу захисан гэсэн. Техник, засвар үйлчилгээ, цахилгааны төлбөрийг нийслэл хариуцдаг” гэ­сэн юм. Харин “Гэрэлтүүлэг чимэглэл” ХХК-ийн захирал А.Цогтсайханаас энэ талаар тодруулахад “Цагны удирд­лагын аппарат нь шатсан. Засвар, үйлчилгээний талаар бид ярилцаж байна. Германд үйлдвэрлэсэн цаг. Тухайн компанитай нь холбогдсон боловч үйлдвэрлэхээ больсон, сэлбэг, хэрэгсэл байхгүй гэсэн” хэмээн ярилаа. 

Холбогдох газрын дарга, мэргэжилтнүүд нь хотын төв талбайд байрладаг, гурван зүгт харсан тэрхүү цагийг хэрхэн засах, хэвийн ажиллагаанд оруулах тухайд мэдээлэлгүй байна.Британи,Швейцар, Австри, Герман, Итали, Франц, Япон, Өмнөд Солонгос зэрэг дэлхийн олон оронд хотын төв талбай, захиргааны байр, түүхэн цамхагт нийтийн зориулалттай том цаг бий. Гэтэл бид төв талбайн цагаа эвдрээд долоо хонож байхад хариуцах эзэнгүй, хэзээ ажиллуулахыг мэдэхгүй суугаа нь харамсалтай.

Ч.Болор