Швейцарийн хөгжлийн агентлаг, Люксенбургийн засгийн газар НҮБ-ын санхүүгийн дэмжлэгтэйгээр Монгол улсын засгийн газар, НҮБ-ын хүн амын сан хамтран Залуучуудын хөгжлийн төслийг хэрэгжүүлж байгаа билээ. Энэ хүрээнд Орхон аймгийн Хүүхэд гэр бүлийн хөгжлийн хэлтсийн дэргэд Залуучуудын хөгжлийн төв нээлтээ хийлээ.
Нээлтэд Залуучуудын хөгжлийн төслийн менежер, Нэгдсэн үндэстний байгууллагын Хүн амын сангийн ажилтан З.Уянга, Хүн амын хөгжил нийгмийн хамгааллын яамны залуучуудын хэлтсийн мэргэжилтэн Ц.Мягмарсүрэн, НҮБ-ын Залуучуудын зөвлөх хорооны зохицуулагч Б.Баярбаатар, Орхон аймгийн иргэдийн төлөөлөгчдийн хурлын дарга Мягмарсүрэн, Засаг даргын орлогч Б.Энхбат, засаг даргын дамгын газрын дарга В.Сумъяасүх, ХГБХХ-н дарга Т.Хонгорзул болон бусад хэлтэс агентлагуудын дарга нар оролцсон юм.
Залуучуудын хөгжлийн төв нь Сургалтын танхим, Олон зорилтот танхим, Зөвлөгөө өгөх өрөө гэсэн гурван өрөөтэйгөөр үйл ажиллагаа явуулна. Энэ төв нь Орхон аймгийн 15-35 насны нийт өсвөр үе залуучуудад зориулсан амьдрах ухаан, нөхөн үржихүй, эрүүл мэнд, гэр бүл төлөвлөлт, хөдөлмөр эрхлэлт, зан үйл, харилцааны чиглэлүүдээр сэтгэл зүйн ганцаарчилсан болон бүлгийн зөвлөгөө өгөх, өсвөр үе залуучуудын оролцоог дэмжих тэдний хүсэл сонирхол хэрэгцээг хангах төрөл бүрийн сургалт зохион байгуулах, чөлөөт цагаа зөв боловсон өнгөрөөх интернет танхим, номын булан гэх мэт олон төрлийн үйлчилгээг үзүүлэх аж.
Өчигдрөөс илүү маргаашийг
бүтээхийн төлөө
