Засгийн газрын “Нүүрс” хөтөлбөрийг хэрэгжүүлэх явцдаа 3.6 тэрбум төгрөг завшсан байж болзошгүй хэрэгт шалгуулж буй, Ерөнхий сайдын ахлах зөвлөх Л.Гансүхийг өчигдөр ШШГЕГ-ын харьяа Цагдан хорих 461 дүгээр ангийн эмнэлгээс батлан даалтад гаргалаа. Шүүх, прокурорын байгууллагын эх сурвалж “Өчигдөр буюу өнгөрсөн даваа гаригт Л.Гансүхийн цагдан хорих хугацааг сунгуулахаар прокурорын байгууллагаас Дүүргийн эрүүгийн хэргийн анхан шатны I шүүхэд хүсэлт гаргасан. Гэвч шүүгч цагдан хорих хугацааг үргэлжлүүлэх шаардлагагүй, батлан даалтад байлгаж мөрдөн байцаалтыг үргэлжлүүлж болно.
Нэгдүгээрт, Л.Гансүх өлсгөлөн зарлаж, улмаар бие нь муудаж, эмчилгээ хийлгэж байгаа, хоёрдугаарт шалгалтын явцад шаардлагатай нотлох баримтаа мөрдөн байцаагч цуглуулсан гэж үзэж байна” гэсэн үүднээс батлан даалтад гаргах тогтоол гаргасан” гэв. Тэрбээр энэ сарын 20-нд өлсгөлөн зарласан бөгөөд бие нь муудаж, эмчилгээнд хамруулах шаардлагатай болсон учраас өнгөрсөн даваа гаригийн 21.00 цагийн үед Төв аймаг дахь ШШГЕГ-ын харьяа Цагдан хорих төвөөс 461 дүгээр ангийн эмнэлэг рүү шилжүүлжээ. Прокурорын байгууллагын эх сурвалжийн мэдээлснээр Дүүргийн эрүүгийн хэргийн анхан шатны I шүүхийнхэн “Нүүрс” хөтөлбөрийн гэх хэрэгт цагдан хоригдсон Тулга нарын бусад сэжигтнийг үргэлжлүүлэн хорих шийдвэр гаргасан байна.
Г.РАВЖАА
