Монголын иргэдийг хууль бусаар Шенгений бүсийн орнуудад нэвтрүүлдэг байсан зохион байгуулалттай бүлгийг Польшийн Цагдаагийн газраас илрүүлжээ.
Тус бүлэг Польшийн Ольштын тойргийн иргэдийн нэрийн өмнөөс жуулчны урилга гарган, Монгол руу явуулж, Шенгений бүсийн орнуудад зорчих эрхтэй виз гаргадаг байсан нь тогтоогджээ.
Жуулчны визтэй монголчууд Франц, Швед, Герман, Испани, Чех зэрэг оронд очингуутаа орогнол хүсэн цагаачилдаг байсан аж. Мөн Ольштын тойргийн аж ахуйн нэгжүүдээс янз бүрийн уулзалт, хурал чуулганы урилга явуулдаг байжээ.
Гэмт бүлэглэлд гурван монгол, гурван польш иргэн байсан аж. Тэд нэг үйлчлүүлэгчээс 2500-3000 еврогийн төлбөр авдаг байсан гэнэ.
Мөрдөн байцаалтаар тэд нийт хуурамч визний 44 удаагийн хэрэг үйлдсэн нь тогтоогдоод байна. Хэрэв гэм буруутай нь тогтоогдвол тэд найм хүртэлх жилийн хорих ялаар шийтгүүлэх юм.
М.СУГАР-ЭРДЭНЭ
