Улаанбаатар хотын цагдаагийн газар, Харилцаа холбооны зохицуулах хороо хамтран цахим тоглоомын газар ажиллуулдаг иргэдтэй өнөөдөр уузлаж ярилцлаа.
Энэ үеэр дунд сургуулийн хүүхэдтэй айл болгонд шахам асуудал болдог цахим тоглоомын газар цагийн хуваарийн дагуу ажиллаж буй эсэх, хүүхэд тоглоомонд донтох гол хүчин зүйл юу болох, бага насны хүүхдүүдийн чөлөөт цагаа өнгөрүүлэх газар нь цахим тоглоомын газар болоод байна уу зэрэг сэдвээр санал солилцсон юм. .
Цахим тоглоомын газарт тоглож буй хүмүүсийг насны ангилалаар нь авч үзвэл бага насныхан, бүх насныхан, 10-аас дээш насныхан, өсвөр насныхан, 13 болон түүнээс дээш насныхан, 17 болон түүнээс дээш насныхан, зөвхөн насанд хүрэгчдэд гээд бүх насныхан тоглодог юм байна.
Харин цахим тоглоомын газар нь Нийслэлийн ИТХТ-ын тогтоолоор 9-16 хүртэлх насанд зуны улиралд буюу дөрөвдүгээр сарын.1-ээс аравдугаар сарын 01-нд 20 цаг хүртэл, өвлийн улиралд буюу аравдугаар сарын 1-ээс дөрөвдүгээр сарын 1 хүртэл 18.0 цаг хүртэл өдөрт нэг удаа хоёр цагаас илүүгүй хугацаагаар үйлчилнэ гэж заасан байдаг байна.
Гэсэн ч энэ төрлийн үйл ажиллагаа явуулдаг газрууд энэ цагийн хуваариа мөрдөж ажилладаггүй талаар хууль хяналтын байгууллагын төлөөлөгчид энэ үеэр онцолоо.
Хүүхдүүдэд бодит амьдралд аюулгүй орчинд амьдрах эрхээр хангадагтай адил интернэтийн онлайн орчинд бас аюулгүй байдалд байх эрхтэй гэдгийг сайтар ойлгуулах нь чухал байдаг. Онлайн орчинд аюулгүй байхын тулд хүүхдүүд юу мэдэх шаардлагатай вэ?
ОУЦХБ(ITU)-аас онлайн орчинд байж, интернэтийг ашиглах хүүхдийг насны ангиллаар гурав хувааж тодорхой чиглэл, зөвлөмжийг боловсруулан гаргасан байна. Үүнд:
5-7 насны хүүхдүүд:
Технологитой харьцаж сурах үе. Эцэг эхийн аль нэг, насанд хүрсэн хүн тогтмол хянаж байх шаардлагатай. Шүүлтүүрийн программуудыг хэрэглэх, аюулгүй сайтуудын жагсаалтыг гаргах нь зүйтэй. Энэ бүлгийнхэн нилээд нийлмэл мэдээллийг ойлгох хүлээн авч чадахгүй магадлалтай тул гол зорилго нь интернэт дэх аюулгүй байдлын үндэс, ёс зүйн ерөнхий ойлголтыг бий болгоход оршино.
Энэ бүлгийн хүүхдүүдийн эцэг эхчүүд тэдэнд зориулж гаргасан зөвлөмж чиглэлийг мөрдөн ажиллах нь зүйтэй. Тусламж хэрэгтэй хамгийн залуу хэрэглэгчидийн бүлэг.
8-12 насны хүүхдүүд:
Энэ үеийнхэн шилжилтийн насныхан байдаг. Тэд интернэтийн талаар анхны ойлголт туршлагатай болсон үе. Залуу хүн болж төлөвших насныхан тул тэдэнд ойлгож сонирхсон маш олон асуудлууд байдаг бөгөөд тэрэндээ хариу авах сонирхолдоо хөтлөгдөн одоо байгаа хязгаараасаа давж болзошгүй. Шүүлтүүрийн программ болон өөр бусад техник хэрэгслийг хэрэглэх нь ашигтай. Энэ насныхан аливаа контент болон контактанд шүүмжлэлтэй ханддаггүй нь элдэв асуудалд татагдах магадлалтай.
13 ба түүнээс дээш насныхан:
Энэ насны бүлгийнхэн технологийг мэргэшсэн хэмжээнд хүртэл сайн эзэмшиж хэн нэгний хараа хяналтгүйгээр ашигладаг залуу үеийнхэн юм. Шүүлтүүрийн программ ач холбогдол багатай ч нэмэлт үүргээ гүйцэтгэсээр байх болно.
Өөрийн хувийн амьдралын замыг бусдын хараа хяналт оролцоогүйгээр хайж олох, үе тэнгийнхнээ олох гэсэн асар их хүсэл эрмэлзлэлтэй. Мөн байгалиас заяасан сексийн асуудлыг сонирхдог хэрэг дурламтгай байдалдаа хөтлөгдөн аюултай байдалд өөрсдийгээ оруулж болзошгүй байдаг. Энэ тохиолдолд тэднийг өөрсдийгээ яаж аюулгүй байлгах вэ гэдгийг ойлгуулах шаардлагатай талаар зөвлөгөө өглөө.
М.Болорцэцэг
