Украины дотоод хэрэгт оролцсон хэмээн Путин Америкийг буруутгав

ОХУ-ын Ерөнхийлөгч Владимир Путин Америкийн CBS, PBS теле­ви­зийн сурвалжлагчидтай ярилцахдаа Ук­раины Ерөнхийлөгч асан Виктор Януковичийг албан тушаалаас нь зай­луулахад АНУ-ын гүйцэтгэсэн үүр­­гийн талаар хөндсөн байна. “Ук­раинд аж төрдөг асар олон хүнтэй бид хэл­хээ холбоотой байдаг болохоор хэн, хэзээ, хаана уулзсаныг, юу хийснийг  сайн мэднэ. Януковичийг уна­га­сан хүмүүс, тэднийг хэн дэмжиж байсан, ямар хэмжээний мөнгө төл­сөн, ямар улсын газар нутаг дээр хэр­хэн бэлтгэлээ хангасан, хэн заавар зөв­лөгөө өгсөн гэх мэт бүх юмыг бид мэд­нэ. Аме­ри­кийн түншүүд ч юмаа нуухаа байсан” гэж Путин хэлжээ.Путин Орос улсаараа бахархдаг, дэл­­хий дахинд дорвитой үүрэг гүй­ц­эт­­гэж байгаасай гэж хүсдэг нь Америкийн сэтгүүлчдэд анзаарагдсан бөгөөд Сирийн хувьд Москвагийн ба­римталж буй бодлого үүнийх нь нэг илрэл гэж тэд дүгнэсэн байна. Орос улс цөмийн зэвсэгтэй учраас дэл­хийд тэргүүлэгч улсуудын нэг гэсэн сэт­гүүлчийн тайлбарыг Путин зөв­шөө­рөөд, аливаа асуудлыг ший­дэх­дээ биднийг харгалзан үзэхгүй байх юм бол бид цөмийн зэвсэгтэй байх хэрэг юун хэмээн хариулсан байна.Хуучин ЗХУ-ын бүрэлдэхүүнд байсан оруудад оршиж байсан дэг­лэ­мийг “өнгөт” хувьсгал, төрийн эргэлт болон Үндсэн хуулийн бус аргаар халж сольж буй дотоод улс төрийнх нь мар­гаантай асуудлыг яагаад ч хүлээн зөвшөөрч боломгүй гэж үздэгээ Путин илэрхийлжээ. “Украины тус­гаар тогтнолыг хүндэтгэн үздэг үү” гэсэн асуултад “Бусад улс ч улс орнуудын тэр дундаа Украины тус­гаар тогтнолыг хүндэтгээсэй гэж хүсдэг. Тусгаар тогтнолыг хүн­дэт­гэнэ гэдэг чинь төрийн эргэлт, Үнд­сэн хуулийн бус үйлдэл хийж, хууль ёсны эрх баригчдыг нь хууль бусаар солих­гүй байна гэсэн үг. Орос улс ийм үйл ажиллагаанд хэзээ ч оролцож байгаагүй, оролцохоор зэхэж ч бай­гаагүй” гэж хариулжээ.  Тэрбээр “Ев­ропт танай улсын цэргийн оролцоо бий юү” гэж сэтгүүлчээс асуугаад “Бий” гэсэн хариулт авсныхаа дараа “Европт АНУ-ын тактикийн цөмийн зэвсэг байгааг мартаж болохгүй. Та нар Германыг эзэлж авч, булаан эз­лэгч цэргээ НАТО-гийн цэрэг болгож өөр­чилсөн шүү дээ. Тэгсэн хэрнээ манай цэргийг аль нэг улстай залгаа хил дээрээ байрлаж байхад гэмт хэрэг гэж үздэг” гэж “сөрөг довтолгоон” хий­сэн байна.