Кыргызэд хоригдлууд оргожээ

Шашны үндэстэй хэт даврах  үзэл, алан хядах ажиллагаанд оролцсоны улмаас шийтгэл хүлээгээд байсан есөн этгээд даваа гаригийн шөнө Кыргызийн нийслэл Бишкек хотоос холгүй орших хорих газраас оргожээ. Тэд засан хүмүүжүүлэх байгууллагын гур­ван ажилтны амийг хороогоод зугтсан бай­на. Зугтах үедээ хоригдлуудын нэг нь шархадсан аж. Дотоод хэргийн яамны ажилт­нууд шуурхай туслсаны дүнд ор­год­луудын тавыг нь баривчилж, нөгөө дөр­вийг эрж хайх ажиллагааг эхлүүлжээ.

Ол­доо­гүй байгаа дөрвийн хоёр нь бүх насаараа хоригдох ялтай, нөгөө хоёр нь мөрдөгдөж байсан гэнэ. Үйл ажиллагааг нь тус улсын нутаг дэвсгэр дээр хориглосон лалын “Жай­шул-Махди” хөдөлгөөний идэвхтэй ги­шүүн, урьд нь шоронд орж явсан, 1977 онд төр­сөн Алтын­бек Итибаев, уг хөдөлгөөний үзэл са­нааг дэлгэрүүлэх хэрэгт идэвхтэй орол­цож ирсэн Эдил Абдрахманов, Азамат Му­су­ралиев нар зугтагсдын дунд байгаа юм байна.

“Жайшул-Махди”, “Жунд аль-Хали­фат”, “Ансаруллак”, “Ат-Такфир валь-Хиж­ра” гэх мэт алафит чиглэлийн “ариун дайнч” хөдөл­гөөний үйл ажиллагааг 2012 онд Кыргызэд хориг­­ложээ. Үүнээс өмнө “Аль-Кайда”, “Та­ли­бан”, “Жихадын бүлэг” гэх мэт лалын хэт дав­рагч, алан хядагч бай­гууллагуудыг мөн хориг­лосон аж.