Ерөнхийлөгч НҮБ-ын Ерөнхий ассамблейн 81 дүгээр чуулганд оролцоно 

Монгол Улсын Ерөнхийлөгч У.Хүрэлсүх АНУ-ын Нью-Йорк хотноо болох НҮБ-ын Ерөнхий ассамблейн 81 дүгээр чуулганы Өндөр түвшний ерөнхий санал, шүүмжлэлд оролцоно. Ерөнхий санал, шүүмжлэл маргааш эхэлж, энэ сарын 28 хүртэл үргэлжлэх юм. Үүнд НҮБ-ын гишүүн 193 орны төр, засгийн тэргүүн нарын 130 гаруй төлөөлөгч оролцож, индэрт үг хэлнэ. 

Энэ жилийн чуулган болон ерөнхий санал, шүүмж­лэлийг “Итгэлцлийг сэргээн тогтоож, шилжил­тийг удирдан чиглүүлж, бүгдэд хүртээмж­тэй НҮБ-ыг цогцлоох нь” сэдвээр зохион бай­гуулах юм. Ерөнхийлөгч У.Хүрэлсүх 81 дүгээр чуулганы Ерөнхий санал, шүүмжлэлд олон улсын харилцааны тулгамдсан асуудлаар Монгол Улсын байр суурийг илэрхийлж үг хэлнэ. 

Түүнчлэн НҮБ-ын Ерөнхий нарийн бичгийн дарга Антонио Гутерреш болон зарим улсын төрийн тэргүүнтэй уулзахаар төлөвлөж байна. Мөн АНУ-ын төвийн бүсэд амьдарч буй монгол иргэдийн төлөөлөлтэй Чикаго хотод уулзана. 

Манай улс 65 жилийн өмнө буюу 1961 онд НҮБ-ын бүрэн эрхт 101 дэх гишүүнээр элссэн түүхтэй. Өнгөрсөн хугацаанд НҮБ-тай олон чиглэлээр, түүний дотор бүс нутаг, олон улсын энх тайван, аюулгүй байдлыг хангах, далайд гарц­­гүй хөгжиж буй орнуудын эрх ашгийг хамгаалах, НҮБ-ын энхийг сахиулах ажилла­гаанд оролцох зэргээр идэвхтэй хамтран ажилладаг. 

НҮБ 1945 онд АНУ-ын Сан Франциско хотод 51 гишүүнтэй байгуулагдсан бөгөөд өдгөө 193 орон элсээд байна.

С.Уул