Манай мал эмнэлгийн лабораториудыг бүсийн хэмжээнд өндрөөр үнэллээ 

Монгол Улсын мал эмнэлгийн лабораториуд ур чадвар, оношилгооны чадамжаа бүсийн хэмжээнд өндрөөр үнэлүүллээ. Тод­руулбал, Мал эмнэлгийн ерөнхий газар (МЭЕГ)-ын харьяа Улсын мал эмнэлэг, ариун цэврийн төв лаборатори, нийслэлийн Мал эмнэлгийн газар, Баянхонгор, Завхан, Өмнөговь, Сүхбаатар болон Төв аймгийн салбарынхан бруцеллёз өвчнийг илрүүлэх ийлдэс судлалын шинжилгээний гурван аргаар оношилгооны чадам­жаа үнэлүүлсэн байна. Сорилыг Тайланд дахь бруцеллёзын бү­сийн лавлагаа лабораторид хийсэн бөгөөд тэд “Монголын лабора­ториудын brucella abortus-ийн ийлдэс судлалын оношилгооны чадамж өндөр түвшинд байгааг сорилын үр дүн харуулсан” хэмээн то­дот­гожээ. 

Сорилд хамрагдсан нийт найман лабораторийн зургаа нь зоонозын халдварт өвчнийг 100 хувьтай оношилсон аж. Харин үлдсэн хоёрт нь оношийн зөрүү гарчээ. Энэ нь бруцеллёзын оношилгооны тех­никийн чадамж, шинжилгээний үр дүнгийн найдвартай байдлыг олон улсын жишгээр баталгаажуулсан үйл явдал болсныг МЭЕГ-ынхан онцолсон юм. 

Тус газрын салбар лабораториуд бүсийн орнуудын лавлагаа лабо­раторийн ур чадварын үнэлгээнд 2014, 2015, 2016, 2021 онд хамраг­даж, 2-3 нь л оношилгооны чадамжаа баталгаажуулж байжээ. Ур чад­варын сорил нь лабораторийн итгэмжлэлийн ISO/IEC 17025:2017 стан­дартыг хэрэгжүүлэх, чанарын удирдлагын тогтолцоог бэх­жүү­ лэх, техникийн чадамжийг тасралтгүй сайжруулах, шин­жил­гээний үр дүнгийн найдвартай байдлыг хангахад чухал үүрэг гүйцэтгэдэг гэнэ.

О.Ундрах