“Бүс нутгийн хэмжээнд аялал жуулчлал сэргэж буй ч эрсдэл нэмэгдэж байна”

Ази, Номхон далайн бүсэд аялал жуулчлал сэргэж буй ч гаднын эрсдэлт хүчин зүйлсийн нөлөө нэмэгдсээр байгааг Азийн хөгжлийн банкнаас анхаарууллаа. Тус банкнаас гаргасан “Азийн хөгж­лийн шинэчилсэн төлөв-2026” тайланд энэ талаар тодорхой дурдсан байна.

Азийн бүс нутаг дахь жуулчлалын урсгал 2026 оны эхний саруудад саарах хандлагатай бай­сан бол хаврын сүүлчээс эргэн сэргэжээ. Аялал жуулчлалын эрэлт бүс нутгийн эдийн засгийн өсөлт, идэвхэд чухал байр суурь эзэлсэн хэвээр буй ч эрчим хүч, хүнсний бүтээгдэхүүний үнийн өсөлт, байгаль, цаг уурын өөрчлөлт, тогтворгүй байдал (Эль Нино), геополитикийн нөхцөл зэрэг нь тус салбарын бүтээгдэхүүн, үйл­ чил­гээний өртөгт үлэмж нөлөөлж эхэлсэн аж. Ялангуяа тээвэр, зочид буудал, хоол үйлдвэрлэл, үйл­чилгээний зардал эдгээрээс шалтгаалан эрс өс­сөнийг тайланд дурджээ. Иймд аялал жуулчлалын сэргэлтийг дэмжих бодлого, арга хэмжээг эр­чимжүүлэх, дотоодын эрсдэлт хүчин зүйлсийн нөлөөг хязгаарлах замаар зах зээлээ хамгаалахыг тус банкны шинжээчид зөвлөв.

Монгол Улсын хувьд жуулчдын урсгалыг нэмэг­дүүлэхээс гадна улирлын хамаарлыг буу­руулах, үйлчилгээний чанар, стандартыг сайжруулах, нэг ая­лагчаас төвлөрүүлэх эдийн засгийн өгөөжийг өсгөх шаардлагатайг онцгойлон дурдсан бай­на. Ташрамд дурдахад, энэ он гарснаас хойш ма­най улсад 807 мянган жуулчин ирсэн буй бөгөөд үүний 32.2 хувь нь орос, 24.4 хувь нь хятад, 18.7 хувь нь солонгос аялагч ажээ.

Н.Дүүл