Мьянмарт сөрөг хүчин илт давуу ялжээ

Нобелийн энх тайвны шагналт Ан Сан Су Чигийн тэргүүлдэг “Ард­чил­лын төлөөх үндэсний лиг” Мьян­мар (Бирм)-ын парламентын анх удаа­гийн чөлөөт сонгуульд олонхийн санал авчээ. 329 суудал авснаар Зас­гийн газраа дангаар бүрдүүлж, Ерөн­хийлөгчөө томилох боломж бүрд­сэн байна. Харин 70 настай Ан Сан Су Чигийн нөхөр нь британи хүн, насанд хүрсэн хүүхдүүд нь өөр улсын иргэн учраас Үндсэн хуульд оруулсан өөрчлөлтийн дагуу тэрбээр Ерөнхийлөгчөөр ажил­­лах боломжгүй аж. Үндсэн хуульд зааснаар Парламентын сууд­лын дөрөвний нэгийг нь зэвсэгт хүч­ний­хэнд өгчихдөг болохоор улс төрийн шийдвэр гаргахад тэд нө­лөө­тэй хэвээр байх юм байна. Гэх­дээ сонгуулийн үр дүнгээр эрх мэд­лийг амгалан тайван шилжүүлэх бо­лом­жоор хангана гэж Мьянмарын арми, түүний удирдагч, генерал Тейн Сейн амлажээ. Хэлмэгдүүлэлт явуулж, гадаад ертөнцөөс улсаа тус­гаар­ласан цэр­гийн дэглэм Мьян­ма­рын эрхийг олон арван жил барьсан юм.“Ардчиллын төлөө үндэсний лиг” 1991 оны сонгуульд ялсан ч эрх ба­риг­чид нь түүнийг хүчингүй болгож Ан Сан Су Чийг баривчилжээ. Тэрбээр шорон хийгээд гэрийн хорионд 15 ор­чим жилийг өнгөрүүлсэн аж.