“Дэлхийн дарга” Умард Солонгост очно

НҮБ-ын Ерөнхий нарийн бич­гийн дарга Бан Ги Мүн энэ до­лоо хоногт Умард Солонгост очих гэж байна. Энэ албанд сон­гогд­соноосоо хойш БНАСАУ-д анх удаа ирж буй нь энэ. Со­лон­гос­чуу­дын хоорондын харилцааг сайжруулж, Умард Солонгосын цө­мийн зэвсгийн асуудлыг шийд­вэр­лэхэд энэ айлчлал ахиц гаргаж болзошгүй хэмээн дэлхийн олон нийт найдаж байна.Умард Солонгос өөрийгөө цө­мийн гүрэн гэж 2005 онд зарлаж, 2006, 2009, 2013 онд газар дор цө­мийн туршилт хийж, олон ул­сын хамтын нийгэмлэгийн зү­гээс эсэргүүцэлтэй тулгарч бай­сан юм. НҮБ-ын Аюулгүйн зөвлөл ч энэ үйлдлээ зогсоохыг шаардаж хэд хэдэн удаа тогтоол гаргаж байв. Цөмийн туршилт хийхгүй, бал­листик пуужин хөөр­гөхгүй байж, Солонгосын хой­гийг цө­мийн зэвсэггүй болгох хэлэл­цээ­рийг сэргээхийг НҮБ шаард­сан аж.

Умард Солонгос их буугаар нутаг дэвсгэр рүү буудлаа хэмээн Өмнөд Солонгос наймдугаар сарын 20-нд зарласнаас хойш Со­лон­­госын хойгийн бай­дал хур­цад­сан юм. Өмнөд Солон­госын тал ч нэлээд олон удаа буу дуугаргаж хариу барьсан. Эцэст нь  талууд биенээ харилцан бу­руут­гаж, заналхийлсэн. Удтал ярилц­саны дүнд энэ бүс нутагт түгшүүртэй байдлыг намжаахаар тохиролцож, НҮБ-ын Ерөнхий нарийн бичгийн даргыг айлч­луу­лахыг зөвшөөрч, олон улсаас тус­гаарлагдсан байдлаасаа гарах арга хайх оролдлого  Пхеньян хийсэн. Энэ айлчлалыг тавдугаар сард хийхээр төлөвлөж байсан ч Умард Солонгос тат­галзсан юм. Харин Бан Ги Мүн Умард Со­лон­гост очих бодлоо ор­хио­гүй гэдгээ дипломат шугамаар нэг бус удаа мэдэгдэж байв.Бан Ги Мүн нь Умард Со­лон­гост очиж буй НҮБ-ын гурав дахь Ерөнхий нарийн бич­гийн дар­га болох юм. 1979 онд  Курт Вальдхайм, 1993 онд Бутрос Бутрос Гали Пхеньянд очиж байв.