Манай улс одоогоор 82.8 мянган га-гаас 103.2 мянган тонн үр тариа, үүнээс 80 мянган га-гаас 99.3 мянган тонн улаан буудай, 13.7 мянган га-гаас 150.1 мянган тонн төмс, 5.89 мянган га-гаас 58.3 мянган тонн хүнсний ногоо, 10.5 мянган га-гаас 26.3 мянган тонн тэжээлийн ургамал, 12.6 мянган га-гаас 6.6 мянган тонн тосны ургамал хураан аваад буйг ХХААХҮЯ-наас мэдээлэв. Ингэснээр улаан буудайн 25.1, төмсний 68.9, хүнсний ногооны 53.8, тэжээлийн 15.4, тосны ургамлын 10.9 хувийг хураан авчээ. Ташрамд дурдахад, маргааш баруун аймгуудын нутгийн зарим газар, төвийн аймгуудын нутгийн баруун хойд, зүүн аймгуудын нутгийн хойд хэсгээр бороо, нөгөөдөр баруун болон төвийн аймгуудын ихэнх нутгаар бороо, нойтон цас орж, цасан шуурга шуурахыг анхааруулав. Салхи маргааш баруун аймгуудын ихэнх нутгаар, нөгөөдөр нутгийн зарим газраар секундэд 15-17 метр хүртэл ширүүсэж, шороон шуурга шуурах аж. Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Эг, Үүр, Идэр, Тэс, Туул, Тэрэлж голын хөндийгөөр шөнөдөө 0-5 градус хүйтэн, өдөртөө 14-19, говийн бүс нутгийн өмнөд хэсгээр шөнөдөө 10-15, өдөртөө 24-29, бусад нутгаар шөнөдөө 2-7, өдөртөө 18-23 градус дулаан байх гэнэ. Маргааш баруун аймгуудын нутгийн баруун хэсэг, нөгөөдөр баруун болон төвийн аймгуудын нутгаар хүйтрэх нь.
Бэлтгэсэн Ц.Ундрал
