Монгол улсын Ардын жүжигчин Д.Ичинхорлоогийн нэрэмжит Архангай аймгийн хөгжимт драмын театрын уран бүтээлчид БНХАУ-ын Өвөрмонгол, ОХУ-ын автономит Буриад улстай хамтын ажиллагаагаа шинэ шатанд гаргажээ.
2013 оноос Улаан-Үүд хотоос нарийн мэргэжлийн найруулагч уран бүтээлчид Цэцэрлэг хотод ажиллаж монголын залуу уран бүтээлчдийг сургаж дадлагажуулсан бол 2014 онд тус театрынхан дурьдсан хоёр орноор гурван сар айлчилан тоглолт хийж, нутаг орныхоо язгуур урлагийг сурталчилсан байна.
Тэд 2014 онд гурван уран бүтээл шинээр босгож 57 удаа тоглолт зохион байгуулан давхардсан тоогоор 37,8 мянган хүнд үйлчилж урын сандаа 258 бүтээлтэй болжээ. Ноднин жилийн мөн үеийнхээс тоглолт, үзэгч, орлогын хэмжээ 0,8-35, 7 хувиар өсчээ.
Харин 2014 онд БНХАУ-ын соёлын өдрүүдийг Цэцэрлэг хотод тус театрынхан хамтран зохион байгуулжээ. Энэ тухайд хөгжмийн зохиолч, хөгжимт драммын театрын хөгжимчин Чойжилсүрэнгийн Төгсбаяр сэтгэл хангалуун уран бүтээл арвин гэдгээ хэлж сэтгэгдлээ хуваалцлаа.
