Үндэсний цэцэрлэгт хүрээлэнг сүйтгэсэн гэх Ү.Оюунзул Гэрлэх ёслолын ордны захирлаар ажиллах нь

Гэрлэх ёслолын ордны захирлаар нийс­­л­элийн ИТХ-ын төлөөлөгч Ү.Оюун­­зулыг томилжээ. Тэрбээр энэ ту­хай цахим хуудсандаа “Хүмүүний амьд­­ралын хамгийн үнэ цэнтэй зүйл бол гэр бүл. Төр оршихуйн үндэс нь ч гэр бүл байдаг. Монгол зон олны гал голомт бадраах хуримын ёслолыг 50 жилийн турш ёслол төгөлдөр зохион байгуулж буй, сайхан энергитэй газ­рын захирлаар томилогдон ажил­ла­хаар боллоо. 50 жилийн хугацаанд 50 мян­га гаруй хос хуримаа хийсэн бай­гуул­лагын үйл ажиллагааг өнгөрсөн, одоо, ирээдүйн алтан аргамж дээр зан­гидан ажиллахыг эрхэмлэнэ. Тө­рийн байгууллагын үйл ажиллагааг олон ний­тэд нээлттэй байлгах зарчим ба­рим­тална” гэх зэргээр бичжээ.
Нийслэлийн ИТХ-ын төлөөлөгчөөр хоёр дахь удаагаа сонгогдон ажиллаж буй тэрбээр 2020-2024 онд буюу дөрвөн жи­лийн хугацаанд Үндэсний цэцэрлэгт хү­рээ­лэнгийн даргаар ажилласан юм. Үүнээс өмнө нь 2016-2018 онд тус хү­рээ­лэнгийн орлогч дарга байсан. Ха­рам­салтай нь, хүрээлэнг өчнөөн жил удирдчихаад дорвитой юу ч хийгээгүй тө­дийгүй бараг сүйрэхэд бэлэн бол­госон талаарх мэдээлэл өнгөрсөн ес­дүгээр сард цахим орчинд тархаж байв. Тод­руулбал, тус хүрээлэнгийн даргын үүргийг хүлээн авсан Ё.Нямжав Үн­дэс­ний цэцэрлэгт хүрээлэн хогондоо да­рагд­сан, 10 гаруй жил үйл ажиллагаа явуул­сан атал цахилгаан, ногоон бай­гуу­­ламжийн усжуулалтыг нь ч ший­дэж ча­даагүй, бие засах газрууд нь ям­бий ам­баараас өөрцгүй болж, хөл бөм­бөг, саг­сан бөмбөг, теннисний тал­бай нь мууд­сан, үндсэндээ сүйрэхэд бэ­лэн бай­гааг олон нийтэд мэдээлсэн удаа­тай.
Гэвч уг асуудал хэрхсэн нь мэдэг­дэх­гүйгээр нам жим болов. Дарга нь байсан Ү.Оюунзул ч хариуцлага хүлээ­сэнгүй өдий хүрсэн. Нийслэлийн ганц том цэцэрлэгт хүрээлэнг сүйрүүлэхээ шах­сан тэрбээр хариуцлага хүлээх нь битгий хэл, харин ч өөр албан ту­шаа­лаар шагнуулчихлаа. Төрийн алба, ялангуяа нийслэл хүний нөөцийн гүн дутагдалд орчихсон юм уу гэж гайх­маар томилгоонуудын нэг нь энэ болов. Нө­гөөтээгүүр, салбар бүрд мэргэжлийн бус, харин намын томилгоонууд газар авсны тод жишээ бол­лоо. Бас нийс­лэлийн ИТХ-ын төлөөлөгчдийг давхар ал­бан тушаалаар шагнадаг уламжлал ийнхүү үргэлжилж байна.
Ташрамд дурдахад, Гэрлэх ёслолын ордон нь нийс­лэлийн харьяа, орон нут­гийн өмчит, аж ахуйн тооцоот үйлд­вэрийн газар юм. Тус байгууллагыг ашиг­гүй үйл ажиллагаа явуулдаг гэх шалт­гаанаар 2015 онд хувьчлах объек­туу­дын жагсаалтад оруулж байв. Нийс­лэлийн ИТХ уг асуудлыг хэ­лэл­цээд, Гэрлэх ёслолын ордныг хувьч­лах шаардлагагүй гэж үзэн, дээрх жаг­саал­таас хасаж байжээ.

М.Оч