ХХАА-н сайд Р.Бурмаа Бүгд Найрамдах Болгар улсын Хөдөө аж ахуй, хүнсний дэд сайд Вассил Грудевийг хүлээн авч уулзлаа. Уулзалтын эхэнд ХХАА-н сайд Р.Бурмаа хоёр орон хөдөө аж ахуйн салбарын техник туслалцааны хөтөлбөрийн хэлэлцээрт гарын үсэг зурсан нь уламжлалт найрсаг харилцаа сэргэх, харилцан ашигтай хамтын ажиллагаа хөгжих суурь боллоо гэж онцлов. Тэрээр Засгийн газраас “Чингис” бондын зээлээр өвлийн хүлэмж барих ажил эхлүүлснийг дуулгаад, хүлэмжийн технологи, менежментийн арга туршлагаар дэлхийд тэргүүлдэг орнуудтай үнэ, чанарын хувьд өрсөлддөг Болгар улстай хүлэмжийн аж ахуйн чиглэлээр хамтран ажиллах сонирхолтой байгаагаа дуулгав. Мөн Болгараас мэргэжилтэн урьж, хүлэмжийн аж ахуй эрхлэгчдэд зөвлөмж, зөвлөгөө өгөх, технологи, менежментийн сургалт зохион байгуулах, өндөр ургацтай, чанартай үр сортыг нутагшуулах, үржүүлэх чиглэлээр хоёр орны Газар тариалангийн хүрээлэн хооронд хамтын ажиллагааг хөгжүүлэх болон Монголын хөдөө аж ахуйн мэргэжилтнүүд, фермерүүдийг Болгарт богино хугацааны сургалт, танилцах аялалд хамруулах хүсэлт тавилаа.
Дэд сайд Вассил Грудев саналыг нааштай хүлээн авч, хөдөө аж ахуйн салбарт техник туслалцааны хөтөлбөрийн тухай хэлэлцээрийн хэрэгжилтийг энэ ондоо багтаан хангах, хүлэмжийн загвар аж ахуйг барьж байгуулах болно гэдгээ хэллээ. Мөн шинжлэх ухааны салбарт хамтран ажиллах боломжтойг онцлоод эл ажлын хүрээнд Газар тариалангийн хүрээлэн хооронд хамтын ажиллагааг хөгжүүлж Монголын цаг уурын нөхцөлд тохирсон үр сортыг гаргаж, нутагшуулах чиглэлээр бодитой ажлыг эхлүүлэхээр тохиролцов. Дэд сайд Мал эмнэлэгийн салбарт малын бүртгэлжүүлэлт, мөрдөн мөшгих системийг Монголд нэвтрүүлэх боломж байгааг хэлээд, энэ чиглэлээр боловсон хүчний чадавхийг дээшлүүлэхэд хамтран ажиллах саналыг тавив. Тэрээр Р.Бурмаа сайдыг ирэх есдүгээр сард Болгар улсад айлчлахыг урьж, тэр үеэр Монгол, Болгарын бизнес уулзалтыг зохион байгуулах хүсэлтэйгээ илэрхийлсэн байна.
