“Уул уурхайн салбар хаашаа чиглэнэ вэ” сэдвийн хуралдаанд оролцогсод тухайн салбарт буруу бодлого явж ирсний үр дүн өнөөдөр гарч байна гэдгийг тодотголоо.
Алтны салбарт хүндрэлтэй зүйл их байсан ч 2014-2015 онд зөв бодлого явуулж ирснээр засрах төлөв ажиглагдаж буйг Алтан Дорнод Монгол ХХК-ийн гүцэтгэх захирал Т.Ганболд онцлов. Өнгөрсөн оны нэгдүгээр сард алтны татварыг тодорхой хэмжээгээр бууруулснаар алтны нийлүүлэлт өсч, улсын хэмжээнд дотоодын компаниуд 13 тонн алт буюу 520 сая ам.долларын валют үүсгэжээ. Түүнчлэн Урт нэртэй хуулинд зохицуулалт хийснээр 200 гаруй лицензийн талбайд 130 орчим тонн алтны нөөц ашиглах боломж үүсч 6 орчим тэрбум ам.доллар эдийн засагт бий болсныг тэрээр онцлов.
Харин Эрдэс баялгийн эдийн засагч Л.Наранбаатар хэлэхдээ,"Өнөөдөр Монгол Улс зэс, нүүрсээрээ том тоглогч болох бүрэн боломжтой. Энэ боломжоо ашиглаж чадахгүй байгаа нь ахархан бодлоготой холбоотой. Монгол Улсад урт хугацааны уул уурхай хэрэгтэй. Нэгэн жишээг дурдахад Австрали улс уул уурхай, ХАА-н бүтээгдэхүүний экспортоороо тэргүүлдэг. Тэдний экспортын нийт орлогыг судлаад үзэхээр эхний аравт “Professional Service”-ээр мөнгө олж байна. Энэ жишиг рүү бид явах ёстой. Уул уурхай бол эдийн засгийг тэлэх суурь. Тэр утгаар нь томоохон компаниудын “Professional Service”-ийг дэмжих ёстой” гэв.
Түүнчлэн Энержи ресурс ХХК-ийн гүйцэтгэх захирал Г.Батцэнгэл"Өнөөдөр муу, муухай бүхнийг уул уурхайн салбар руу чихэж байна. Тиймээс салбарын зовлон, жаргалыг ойлгодоггүй хүмүүст зөв мэдээллийг өгөхөд хамтарч ажилламаар байна. Бодит мэдээллийг олон нийтэд хүргэснэээр тэд эрүүл ухаанаар дүгнэлт хийх боломжтой" хэмээн тодотголоо.
