Футзалын 10 дахь удаагийн ДАШТ энэ сарын 14-нд Узбекистаны Ташкент, Бухара, Андижан хотод эхэлсэн билээ. Урьдчилсан тэмцээнээс шалгарсан 24 шилдэг баг зургаан хэсэгт хуваагдан тоглож буй бөгөөд эхний өдрөөс л сенсац, гэнэтийн бэлгүүд задрав. Футзалын ДАШТ-ийг 175 орон шууд дамжуулан үзүүлж буй аж. Монголын хөл бөмбөг сонирхогчид “FIFA plus”-аар үзэх боломжтой. Хэсгийн тоглолтын явцаас тоймлон хүргэе.
А ХЭСЭГ: Узбекистан, Нидерланд, Парагвай, Коста-Рика Тэмцээнийг зохион байгуулагч (Олон улсын хөл бөмбөгийн холбоо (FIFA)-ны тэмцээн анх удаа Төв Азийн улсад зохион байгуулж байна) Узбекистаны шигшээ нээлтийн тоглолтод дэлхийн аваргын мөнгөн медальт Нидерландтай 3:3-аар тэнцэж, хөгжөөн дэмжигчдээ баярлууллаа. Гурван удаа гоол алдсанаа нөхөн, сүүлчийн минутад тэнцүүлсэн. Тоглолтын үеэр 12 500 хүний суудалтай “Хумо арена” пиг дүүрч, уур амьсгал ч гайхамшигтай байв. Хоёр дахь тоглолтоо узбекүүд Парагвайтай хийж 1:4-өөр хожигдлоо. Энэ хэсэгт Парагвай хоёр хожилтой (эхний тоглолтод Коста-Рикаг 5:2- оор хожсон) яваа. Нидерланд хоёр дахь тоглолтдоо мөн л (Коста-Рикатай 2:2) хайнцлаа. Сүүлийн тойрогт Узбекистан Коста-Рикаг хожиход л хасагдах шатанд үлдэх бүрэн боломжтой.
B ХЭСЭГ: Бразил, Тайланд, Хорват, Куба Футзалын ДАШТ-ий таван алт, нэг мөнгө, хоёр хүрэл медальт Бразил энэ хэсгийн төдийгүй тэмцээний гол фаворит. Тэд Кубыг 10:0, Хорватыг 8:1-ээр тус тус төвөггүй хожин, плей-оффт үлдэх эрхээ авсан. Энэ хэсэгт мөн Хорватыг 2:1, Кубыг 10:5-аар хожсон Тайландын шигшээ шөвгийн 16-д шалгараад байна.
С ХЭСЭГ: Аргентин, Украин, Афганистан, Ангол ДАШТ-ий алт, мөнгөн медальт Аргентин эхний тоглолтдоо Украиныг 7:1-ээр “машиндлаа”. FIFA-гийн шигшээ тэмцээнд анх удаа “тоосоо өргөж” буй Афганистан Анголыг 6:4- өөр хожин түүхэн ялалт байгуулав.
D ХЭСЭГ: Ливи, Испани, Казахстан, Шинэ Зеланд Ливи ДАШТ-д гурван удаа оролцсон туршлага зааж, анх удаа өрсөлдөж буй Шинэ Зеландыг 3:1-ээр хожлоо. Харин Казахстан футзалын яах аргагүй нэг гранд Испанитай 1:1-ээр тэнцэж шуугиулав. Гэхдээ Казахстан өмнөх ДАШТ-д шөвгийн дөрөвт үлдсэн, муу баг биш гэдгийг санах хэрэгтэй. Мэдээж иргэншлээ сольж, Казахстаны шигшээд тоглодог бразил гаралтай тамирчид багийн амжилтад чухал үүрэгтэй.
Е ХЭСЭГ: Португал, Марокко, Тажикистан, Панам Дэлхийн аварга цолыг хадгалж буй Португал Панамыг 10:1-ээр бут ниргэсэн бол мароккочууд Тажикистаны багийг 4:2-оор хожив.
F ХЭСЭГ: Иран, Франц, Гватемал, Венесуэл Азийн футзалын шилдэг баг, ДАШТ-ий хүрэл медальт Иран Венесуэлийг 7:1-ээр хөнгөхөн хожсон. Тэгвэл ДАШТ-д анх удаа орж буй Францын “мини-хөл бөмбөгчид” Гватемалын багийг 6:3-аар яллаа. Хэсэг тус бүрээсшилдэг хоёр, нийт 12 баг хасагдах шатанд дэвшинэ. Мөн хэсэгтээ гуравдугаар байр эзэлсэн багуудаас шилдэг үзүүлэлттэй дөрөв нь хасагдах шатанд өрсөлдөх эрхтэй юм.
Ц.ЭНХТҮВШИН
