Энэ удаагийн “SciCon”-ийн тайзнаа дэлхийн физикийн шинжлэх ухааны хамгийн том төв болох CERN-д ажилладаг монгол эрдэмтэн, ШУА-ийн Физик технологийн хүрээлэнгийн Хүнд кваркын судалгааны лабораторийн эрхлэгч, доктор Б.Баасансүрэн оролцоно. Тэрбээр ертөнцийн үүсэл, атомын задрал болон орчин үеийн физикийн тулгуур асуултуудын талаарх шинэ судалгаагаа энэ үеэр танилцуулах юм. Мөн МУИС-ийн Физикийн тэнхимийн дэд профессор, доктор Б.Төгөлдөр байгаль дэлхий, цаг хугацаа, орон зай, атомын түвшинд орших “тэгш хэм”-ийн нууцыг тайлбарлаж, орчлон ертөнц хэрхэн “эвдэрсэн тэгш хэм”-ийн үр дүнд бүрэлдсэн талаарх илтгэл хэлэлцүүлнэ. Түүнчлэн МУИС-ийн Биологийн тэнхимийн дэд профессор, доктор Ө.Энэрэлт шувуудын нүүдэл болон тэдгээрийн молекул түвшний “луужин”-г квант биологийн үүднээс задлан шинжилж, байгалийн энэхүү гайхамшиг ирээдүйн технологийн инновацад хэрхэн нөлөөлөх талаар байр сууриа хуваалцах аж.
Салбартаа тэргүүлэгч эрдэмтдийг нэгтгэсэн эл арга хэмжээ нь хүүхэд, залууст ертөнцийн нууцлаг өнцгүүдийг нээж, инновацын ирээдүйгээр аялах боломж олгох бөгөөд тасалбар нь 50 мянган төгрөгийн үнэтэй юм байна.
Э.Сондор
