ГБХНХЯ-ны Төрийн нарийн бичгийн дарга Л.Мөнхзул “Эл хуулийн төслийн гол зохицуулалт нь ажилтан болон ажил олгогч харилцан зөвшилцөж, гэрээний үндсэнд тодорхой хэмжээний шимтгэл төлөх замаар тухайн хүний ирээдүйн нийгмийн баталгааг хангах, хуримтлал үүсгэх боломж олгоход чиглэж байгаа. Төрөөс шимтгэлийн хувь хэмжээг тогтоохгүй бөгөөд энэ нь зөвхөн ажилтан, ажил олгогч хоорондоо тохиролцсон хөтөлбөр байх юм. Харин уг хөтөлбөрийг албан ёсоор бүртгэлжүүлж, баталгаажуулах шаардлагатай” гэв. Мөн дэд сайд Б.Солонгоо “Томоохон аж ахуйн нэгж, байгууллагууд ажилтнууддаа зориулан хувийн нэмэлт тэтгэврийн сан бий болгож эхэлсэн. Гэвч эдгээр сангийн үйл ажиллагааг зохицуулах эрх зүйн орчин хангалтгүй. Улмаар энэ нь ажилтнуудын эрх ашгийг хамгаалахад хүндрэл учруулж байна. Тиймээс нэмэлт тэтгэврийн тогтолцоог сайн дурын үндсэнд ажилтан , ажил олгогч хамтран бүрдүүлж, мэргэшсэн компаниар удирдуулснаар иргэд зөвхөн Нийгмийн даатгалын сангаас хамааралгүй, олон эх үүсвэрээс тэтгэврийн орлого авах боломж бүрдэнэ” гэсэн юм.
У.Сүрэн
