Дэлхийд өрсөлдөх чадвараар Монгол Улс 70 орноос 67-д эрэмбэлэгджээ 

Швейцарт төвтэй “Дэлхийн өрсөлдөх чадварын төв”-өөс 38 дахь жилдээ эрхлэн гаргаж буй “Дэлхийн өрсөлдөх чад­варын жилийн тайлан”-д энэ жил 70 орныг хамруулжээ. Харь­цуулах боломжтой 70 улсаас Монгол 67-д жагсан Нигери, Намиби, Венесуэлийг ардаа орхисныг Эдийн засгийн бодлого, өрсөлдөх чадварын судалгааны төв (ЭЗБӨЧСТ)-өөс өчигдөр мэдээллээ. Эдийн засгийн тамир тэнхээ, засаглалын үр ашиг, бизнесийн байгууллагын ашигт ажиллагаа, дэд бүтцийн хөгжил гэсэн үндсэн дөрөв, дэд 341 үзүүлэлтийг харгалзан тооцдог дээрх тайланд манай улс 57-60 дугаар байрт эрэмбэлэгдэж ирсэн ч 2024 оноос ухарсаар ийнхүү 39.02 оноогоор сүүлээсээ дөрөвт бичигдлээ. Өнгөрсөн жил 40.91 оноо авч, 65 дугаарт эрэмбэлэгдэж байсан ч хэрэглээний үнийн өсөлт, татвараас зайлсхийх явдал, зээлийн хүүгийн дарамт, орчны бохирдол, төрийн өмчит аж ахуйн нэгжүүдийн үр ашиггүй байдал зэр­гээс шалтгаалан ийнхүү түвшин буурсан аж. Улмаар инфляц бо­лон улсын өрийн дахин санхүүжилтийн мөчлөгүүд нь тө­сөв, өрхийн амьжиргаанд сөргөөр нөлөөлж, худалдан авах чадварыг улам бууруулж болзошгүй гэнэ. Түүнчлэн ур чад­вар­тай ажиллах хүчний хомсдол, хөдөлмөрийн бүтээм­жийн зөрүүгээс улбаалан зонхилох салбаруудад хүний нөө­цийн дутагдал үүсэж, дэд бүтэц, ложистикийн бэрхшээл нь өр­төг зард­лыг улам өсгөн, экспортын хэмжээг бууруулж, эдийн засгийг “агшаах” магадлалтайг дээрх тайланд тэмдэглэжээ. Ташрамд дурдахад, өрсөлдөх чадвараар Син­гапур тэр­гүүлж, Хон­конг, Швейцар, Тайвань, Арабын нэгдсэн Эми­рат улс удаал­жээ. Харин Швед ес, АНУ аравдугаар байрт жагссан байна.